ముఖ్యమంత్రి ఎ. రేవంత్ రెడ్డి తన విదేశీ పర్యటన కోసం మంగళవారం రాత్రి హైదరాబాద్ నుంచి ఢిల్లీకి బయలుదేరారు. అక్కడ కాంగ్రెస్ పార్టీ అత్యున్నత నిర్ణయాత్మక కమిటీ అయిన సీడబ్ల్యూసీ (CWC) సమావేశంలో పాల్గొన్న అనంతరం, ఆయన లండన్కు ప్రయాణమవుతారు. ఆగస్టు 20 అర్ధరాత్రి 12:30 గంటలకు ఢిల్లీ నుంచి ఎయిర్ ఇండియా విమానంలో బయలుదేరి, స్థానిక కాలమానం ప్రకారం అదే రోజు ఉదయం 7 గంటలకు లండన్ చేరుకుంటారు.
యూకేలో పర్యటనలో భాగంగా ఆగస్టు 21న ఆక్స్ఫర్డ్ యూనివర్సిటీలోని బ్లావాట్నిక్ స్కూల్ ఆఫ్ గవర్నమెంట్ను సీఎం సందర్శిస్తారు. అదే రోజు సాయంత్రం ఎమిరేట్స్ స్టేడియంలో జరిగే ఈపీఎల్ (EPL) ఫుట్బాల్ ప్రెజెంటేషన్ కార్యక్రమంలో పాల్గొంటారు. మరుసటి రోజు ఆగస్టు 22న కేంబ్రిడ్జ్ బృందంతో సమావేశం కావడం, లండన్ యూనివర్సిటీ సెనేట్ హౌస్, లండన్ బిజినెస్ స్కూల్ను సందర్శించడం వంటి కార్యక్రమాలు ఉన్నాయి.
యూకే పర్యటన ముగించుకుని ఆగస్టు 23న సీఎం రేవంత్ రెడ్డి అమెరికాలోని బాస్టన్కు వెళ్తారు. అక్కడ ఆగస్టు 24న హార్వర్డ్, ఎంఐటీ (MIT) విశ్వవిద్యాలయాలను సందర్శించి, రాత్రికి న్యూయార్క్కు బయలుదేరతారు. ఆగస్టు 25న నోర్త్-ఈస్టర్న్ యూనివర్సిటీ సందర్శనతో పాటు వర్జీనియా టెక్ యూనివర్సిటీ ప్రతినిధులతో ఆయన సమావేశం కానున్నారు.
అమెరికా పర్యటనలో భాగంగా ఆగస్టు 26న న్యూయార్క్లో ఇండియన్ ఓవర్సీస్ కాంగ్రెస్ (USA) ఆధ్వర్యంలో నిర్వహించే ‘మీట్ అండ్ గ్రీట్’ కార్యక్రమంలో సీఎం పాల్గొంటారు. ఈ వేదికపై ప్రవాస భారతీయులు, వివిధ వర్గాల ప్రతినిధులతో ఆయన మాట్లాడే అవకాశం ఉంది. ఈ పర్యటన ద్వారా విద్య, పరిశ్రమలు, పెట్టుబడులు, అంతర్జాతీయ భాగస్వామ్యాల అంశాలపై చర్చలు జరగనున్నాయి.
అమెరికా పర్యటనను ముగించుకుని ఆగస్టు 29న సీఎం రేవంత్ రెడ్డి న్యూయార్క్ నుంచి తిరుగు ప్రయాణం అవుతారు. ఆగస్టు 30న ఆయన హైదరాబాద్ చేరుకుంటారు. ఈ పర్యటనలో భాగంగా ఆయన పలు ప్రముఖ విద్యా సంస్థలు, వ్యాపార సంస్థల ప్రతినిధులతో సమావేశమై రాష్ట్ర అభివృద్ధికి సంబంధించిన అంశాలపై చర్చించనున్నారు.
