ఆదిలాబాద్ జిల్లాలో ఈ ఏడాది 1.16 కోట్ల చేప పిల్లలను చెరువులు, రిజర్వాయర్లలో వదలాలని మత్స్యశాఖ అధికారులు ప్రణాళికలు సిద్ధం చేశారు. ఇందులో భాగంగా 216 చిన్న చెరువుల్లో 83.53 లక్షలు, 6 పెద్ద చెరువులు మరియు 2 రిజర్వాయర్లలో 32.70 లక్షల చేప పిల్లలను వదలాలని నిర్ణయించారు. అయితే, వానకాలం సీజన్ మొదలై రెండున్నర నెలలు దాటినా ఈ ప్రక్రియ ఇంకా ప్రారంభ దశలోనే ఉంది.
గతంలో బీఆర్ఎస్ ప్రభుత్వం వానకాలం ప్రారంభంలోనే మత్స్యకారులకు ఉచితంగా చేప పిల్లలను సరఫరా చేసేది. ప్రస్తుతం కాంగ్రెస్ ప్రభుత్వం అధికారంలోకి వచ్చిన తర్వాత ఈ పథకం అమలులో జాప్యం జరుగుతోందని మత్స్యకారులు ఆవేదన వ్యక్తం చేస్తున్నారు. చెరువులు, ప్రాజెక్టుల్లో నీరు చేరిన వెంటనే చేప పిల్లలను వదిలితే అవి బాగా పెరిగి మంచి దిగుబడి వస్తుందని, ఆలస్యమైతే నీటి వనరుల్లో నీరు తగ్గి చేపల ఎదుగుదలపై ప్రభావం చూపుతుందని వారు చెబుతున్నారు.
ఉట్నూర్ మండలంలోని గంగన్నపేట, గోపాల, సరస్వతి, ఎల్లమ్మ, గుడి చెరువుల కోసం మత్స్యకారులు సుమారు రూ. 6.50 లక్షలు ఖర్చు చేసి 10 లక్షల చేప పిల్లలను సొంతంగా కొనుగోలు చేశారు. ప్రభుత్వం టెండర్ల ద్వారా సరఫరా చేసే చేప పిల్లలు నాసిరకంగా ఉండటంతో పాటు, సీజన్ ముగిసిన తర్వాత అందుతున్నాయని మత్స్యకారులు విమర్శిస్తున్నారు. చేప పిల్లలకు బదులుగా సొసైటీలకు నేరుగా చెక్కుల రూపంలో డబ్బులు ఇస్తే, తామే నాణ్యమైన పిల్లలను కొనుగోలు చేసుకుని ఉపాధిని మెరుగుపరుచుకుంటామని వారు కోరుతున్నారు.
