మంచిర్యాల జిల్లా చెన్నూరు మున్సిపాలిటీలో రూ.1.40 కోట్ల నిధులతో పూర్తి చేసిన కొత్త బైపాస్ రోడ్డును రాష్ట్ర కార్మిక, మైనింగ్ శాఖ మంత్రి వివేక్ వెంకటస్వామి ప్రారంభించారు. ఎన్నికల కోసం హంగామా చేసే అలవాటు తమకు లేదని, అభివృద్ధిని చేతల్లో చూపిస్తామని ఆయన స్పష్టం చేశారు. గత ప్రభుత్వం కేవలం శంకుస్థాపనలకే పరిమితమైందని విమర్శించారు.
చెన్నూరులో రోడ్డు విస్తరణ పనుల కోసం తమ కట్టడాలను స్వచ్ఛందంగా తొలగించుకున్న యజమానులను మంత్రి అభినందించారు. విస్తరణలో షాపులు కోల్పోయిన 70 మందికి కొత్తగా నిర్మించే షాపింగ్ కాంప్లెక్స్లలో స్థలం కేటాయిస్తామని హామీ ఇచ్చారు. గత ప్రభుత్వ హయాంలో ఇళ్లు, షాపులు కోల్పోయిన వారికి కూడా న్యాయం చేస్తామని ఆయన పేర్కొన్నారు. అలాగే చెన్నూరు చెరువులోని శివాలయాన్ని పర్యాటక కేంద్రంగా తీర్చిదిద్దుతామని ప్రకటించారు.
హాస్టల్ విద్యార్థుల సమస్యలపై మంత్రి స్పందిస్తూ, వీటిని యుద్ధప్రాతిపదికన పరిష్కరించాలని కలెక్టర్ కుమార్ దీపక్ను ఆదేశించారు. అయితే, విద్యార్థుల సమస్యలను రాజకీయాలకు వాడుకోవడంపై ఆయన మండిపడ్డారు. మైనారిటీ హాస్టళ్లలో ఆహారంలో కారం కలిపి ఫొటోలు తీస్తూ ప్రభుత్వంపై తప్పుడు ప్రచారం చేస్తున్నారని, అనుమతి లేకుండా హాస్టళ్లలోకి వస్తే సహించేది లేదని హెచ్చరించారు.
ప్రజలకు అందుబాటులో ఉండటంపై స్పందిస్తూ, గతంలో ఎమ్మెల్యేలు స్థానికంగా ఉండేవారు కాదని, తాను వారానికి ఒకసారి వస్తున్నానని మంత్రి గుర్తుచేశారు. చెన్నూరు ప్రజల తాగునీటి ఇబ్బందులను తొలగించేందుకు రూ.40 కోట్ల వ్యయంతో గోదావరి నది నుండి నీటిని సరఫరా చేయనున్నట్లు మంత్రి వివేక్ వెంకటస్వామి వెల్లడించారు.
