బాపట్ల జిల్లా పర్చూరు నియోజకవర్గ వైసీపీ కార్యకర్తల సమావేశంలో పాల్గొన్న జగన్ మోహన్ రెడ్డి, తన తదుపరి పాదయాత్రపై స్పష్టత ఇచ్చారు. 2027 సంవత్సరం సెప్టెంబర్ లేదా అక్టోబర్ నెలలో ఈ యాత్రను ప్రారంభిస్తానని ఆయన తెలిపారు. పర్చూరు నియోజకవర్గం మీదుగా కూడా తన యాత్ర సాగుతుందని ఆయన పేర్కొన్నారు.
ప్రస్తుత చంద్రబాబు సారథ్యంలోని కూటమి ప్రభుత్వంపై జగన్ విమర్శలు చేశారు. ఎన్నికలకు ముందు ఇచ్చిన మ్యానిఫెస్టోను ప్రభుత్వం అమలు చేయడం లేదని, ఎన్నికలు ముగిశాక మ్యానిఫెస్టో కనిపించకుండా పోయిందని ఆయన ఆరోపించారు. రైతులు నష్టాల్లో ఉన్నప్పుడు తమ ప్రభుత్వం రైతు భరోసా కేంద్రాల ద్వారా వారిని ఆదుకుందని ఆయన గుర్తు చేశారు.
స్థానిక సంస్థల ఎన్నికల నిర్వహణపై కూడా జగన్ అనుమానాలు వ్యక్తం చేశారు. బీసీలకు 34 శాతం రిజర్వేషన్లు కల్పిస్తామని చెబుతున్న ప్రభుత్వం, కోర్టు ఆ రిజర్వేషన్లను కొట్టివేస్తుందనే సాకుతో ఎన్నికలను వాయిదా వేయడానికి కుట్ర చేస్తోందని ఆయన ఆరోపించారు. ఓటర్ల జాబితా సమగ్ర సవరణ (SIR) కార్యక్రమంలో భాగంగా ఇప్పటికే 44 లక్షల ఓట్లు గల్లంతయ్యాయని ప్రభుత్వం చెబుతోందని, ఇటువంటి పరిస్థితుల్లో ఎన్నికలు ఎలా జరుగుతాయని ఆయన ప్రశ్నించారు.
చంద్రబాబు సీఎంగా ఉన్నంతకాలం ఎన్నికలు సాఫీగా జరిగే అవకాశం లేదని జగన్ వ్యాఖ్యానించారు. ప్రభుత్వాన్ని ప్రశ్నించే వారిపై అక్రమ కేసులు నమోదు చేసి, అరెస్టులు చేస్తున్నారని ఆయన విమర్శించారు. రోజుకో డ్రామాతో డైవర్షన్ పాలిటిక్స్ కొనసాగుతున్నాయని ఆయన మండిపడ్డారు.
రాబోయే స్థానిక సంస్థల ఎన్నికలు కురుక్షేత్ర సంగ్రామం వంటివని జగన్ కార్యకర్తలకు పిలుపునిచ్చారు. ఎన్నికలు సాఫీగా జరిగితే వైసీపీ విజయం ఖాయమని ఆయన ధీమా వ్యక్తం చేశారు. ఒకవేళ ఎన్నికలు సాఫీగా జరగనివ్వకపోయినా, కార్యకర్తలు గట్టిగా పోరాడాలని ఆయన సూచించారు.
