సంగారెడ్డి జిల్లా సదాశివపేటకు చెందిన మేకల అనురాధా దాస్ రెగ్జిన్పై ఏడు గజాల చీరను చిత్రించి ప్రపంచ రికార్డు సాధించారు. ఆమె గీసిన చీరలో జరీ అంచులు, బూటాలు, పల్లూ యథాతథంగా కనిపించడంతో చూసిన వారందరూ అది నిజమైన శారీ అనుకున్నారు. ఈ 'పొడవైన రెప్లికా ఆర్ట్'ను బ్రిలియంట్ బుక్ ఆఫ్ వరల్డ్ రికార్డ్ గుర్తించి సర్టిఫికెట్ ఇచ్చింది.
పద్మశాలీ కుటుంబంలో జన్మించిన అనురాధాకు తల్లి కలంకారీ పని, అల్లికలు చిత్రకళపై ఆసక్తి కలిగించాయి. చిన్నప్పుడు పాఠ్య పుస్తకాల్లో ఆకులు, పూలు పెట్టి వాటి అచ్చులతో బొమ్మలు గీసేవారు. ఎండిన పూల రేకులు, దృఢంగా ఉండే ఆకులపై రంగులు వేయడం మొదలుపెట్టి, తర్వాత పచ్చి ఆకులపై అక్షరాలు, దేవతల రూపాలు, ప్రముఖుల ముఖచిత్రాలు చెక్కడం నేర్చుకున్నారు.
స్కూల్ రోజుల్లోనే లోయర్, హయ్యర్ డ్రాయింగ్ సర్టిఫికెట్ కోర్సులు పూర్తి చేసి అనేక పోటీల్లో బహుమతులు గెలుచుకున్నారు. పెండ్లి తర్వాత హైదరాబాద్లో ఉంటూ 45 రోజుల టెక్నికల్ టీచర్ సర్టిఫికెట్ (టీటీసీ) కోర్సు పూర్తి చేశారు. ప్రస్తుతం మునిపల్లి మండలం పెద్దగోపులారం గ్రామ ప్రాథమిక పాఠశాలలో సెకండరీ గ్రేడ్ టీచర్గా పని చేస్తున్నారు.
ఆర్టిస్ట్ నాగేశ్వరరావు కాగితంపై దినపత్రికను చిత్రించినట్లు చూసి, తాను కూడా ఏదైనా ప్రత్యేకం చేయాలనుకున్నారు. పద్మశాలీ కుటుంబ నేపథ్యం దృష్ట్యా చీరను రెప్లికా చేయాలని నిర్ణయించుకుని ఈ అద్భుత సృష్టికి ఒడిగట్టారు. ప్రభుత్వ ఉపాధ్యాయులకు ఇచ్చే టీటీసీ శిక్షణను ఆమె ఇప్పుడు వేసవిలో ఇతరులకు అందిస్తున్నారు.
చిన్నప్పుడు చదవలేకపోయిన కోర్సుకే ఇప్పుడు శిక్షణ ఇచ్చే బాధ్యతలో ఉన్న అనురాధా, ఇంకా ఎన్నో మైలురాళ్లు అందుకోవాలని లక్ష్యంగా పెట్టుకున్నారు. తన నైపుణ్యంతో అనుకున్న లక్ష్యాన్ని చేరుకుంటానన్న నమ్మకంతో ముందుకు సాగుతున్నారు.
