పిల్లల ప్రతి పనిలోనూ జోక్యం చేసుకుని తప్పులను సరిదిద్దడమే పెంపకం అని చాలా మంది తల్లిదండ్రులు భావిస్తుంటారు. కానీ నలుగురి ముందు ధైర్యంగా మాట్లాడటమే ఆత్మవిశ్వాసం కాదని, 'నేను ఇది చేయగలను' అనే నమ్మకాన్ని కలిగించడమే నిజమైన ఆత్మస్థైర్యమని సైకాలజిస్ట్లు స్పష్టం చేస్తున్నారు. పిల్లలు చేసే పనుల్లో తప్పులు లేదా ఫలితాల కంటే, వారు పెట్టిన కష్టాన్ని, ప్రయత్నాన్ని అభినందించాలని వారు సూచిస్తున్నారు.
ఆత్మవిశ్వాసం పుట్టుకతో వచ్చేది కాదని, తప్పులను ప్రేమతో సరిదిద్దే పెద్దల నుంచే అది అలవడుతుందని అనేక అధ్యయనాలు తెలియజేస్తున్నాయి. పిల్లలు ఏదైనా పని మొదలుపెట్టినప్పుడు ముందే జాగ్రత్తలు చెప్పడం లేదా సరిదిద్దడం మానేసి, వారిని స్వయంగా ప్రయత్నించనివ్వాలి. స్కూల్ బ్యాగ్ సర్దుకోవడం, రెస్టారెంట్లో ఆహారం ఆర్డర్ చేయడం, దుస్తులు ఎంచుకోవడం వంటి విషయాల్లో నిర్ణయాలు వారే తీసుకోనివ్వాలి. ఇలా తప్పుల నుంచే పిల్లలు సొంతంగా నిర్ణయించుకునే సామర్థ్యాన్ని పెంచుకుంటారని నిపుణులు అంటున్నారు.
తప్పులను సున్నితంగా సరిదిద్దాలి తప్ప, వాటిని నవ్వుతూ వదిలేయాలని కాదు. ఇంట్లోనే పరిష్కారాలు చూపించడం వల్ల, ఓటమి ఎదురైనప్పుడు పిల్లలు కుంగిపోకుండా దాని నుంచి గుణపాఠం నేర్చుకుంటారు. క్లాస్లో ఫస్ట్ రావడం లేదా ఆటల్లో గెలవడం మాత్రమే కాకుండా, పరీక్షల్లో ఫెయిల్ అయినా లేదా ఓడిపోయి ఇంటికి వచ్చినా 'ఏం కాదులే, బాగా కృషి చేశావు, ఇంకోసారి ప్రయత్నించు' అని దన్నుగా నిలవాలి.
తల్లిదండ్రులు మాటల కంటే చర్యల నుంచే పిల్లలు ఎక్కువగా నేర్చుకుంటారు. పిల్లలు తప్పు చేస్తే నిలదీయకుండా, 'నేను కూడా తప్పులు చేశాను' అని దగ్గరికి తీసుకుని కారణాన్ని సరిచేసి నేర్పించాలి. ఖరీదైన పాఠశాలలు లేదా అద్భుత విజయాల కంటే, 'మేమున్నాం' అనే తల్లిదండ్రుల భరోసానే పిల్లలకు ఎక్కువ ఆత్మస్థైర్యాన్ని ఇస్తుందని సైకాలజిస్ట్లు తెలియజేస్తున్నారు.
