అక్కినేని అఖిల్ నటించిన 'లెనిన్' సినిమా జూలై 10న ప్రేక్షకుల ముందుకు వచ్చి బాక్సాఫీస్ వద్ద భారీ వసూళ్లు రాబట్టింది. మురళి కిషోర్ అబ్బూరి దర్శకత్వంలో తెరకెక్కిన ఈ గ్రామీణ నేపథ్య చిత్రం కేవలం మూడు రోజుల్లోనే ప్రపంచవ్యాప్తంగా రూ. 61.1 కోట్లకు పైగా కలెక్షన్లు సాధించి ట్రేడ్ వర్గాలను ఆశ్చర్యపరిచింది.
ఈ అనూహ్య విజయంపై మెగాస్టార్ చిరంజీవి ఎక్స్ వేదికగా స్పందించారు. అఖిల్ నటనకు లభిస్తున్న ప్రశంసలు తనను ఎంతో సంతోషపరిచాయని, అఖిల్ తనకు మరో కొడుకుతో సమానమని ఆయన పేర్కొన్నారు. నాగార్జునకు, చిత్రబృందానికి అభినందనలు తెలిపిన చిరంజీవి, త్వరలోనే సినిమాను చూస్తానని హామీ ఇచ్చారు.
చిరంజీవి ప్రశంసలకు నాగార్జున కృతజ్ఞతలు తెలపగా, అఖిల్ స్పందిస్తూ 'పెదనాన్న మీ ప్రేమ ఎప్పుడూ అమితమైంది, మీ సహకారానికి ధన్యవాదాలు' అని రిప్లై ఇచ్చారు. మెగా, అక్కినేని కుటుంబాల మధ్య ఉన్న ఈ అనుబంధం, 'పెదనాన్న' అనే పిలుపు సోషల్ మీడియాలో విస్తృతంగా చర్చనీయాంశమై ఇరు కుటుంబాల అభిమానుల్లో ఉత్సాహం నింపుతోంది.
రామ్ చరణ్ 'పెద్ది' సినిమా కోసం అఖిల్ తన సినిమా విడుదలను వెనక్కి నెట్టిన సంగతి తెలిసిందే. థియేటర్లలో టిక్కెట్ ధరలు పెంచకపోవడం, వీకెండ్ కలిసొరావడంతో మూడో రోజు వసూళ్లు తొలి రెండు రోజుల రికార్డులను బ్రేక్ చేశాయి. ఈ జోరు కొనసాగితే అఖిల్ తొలిసారి రూ. 100 కోట్ల క్లబ్లో చేరడం ఖాయమని ఫ్యాన్స్, సినీవర్గాలు అంచనా వేస్తున్నాయి.
