ఇరాక్కు చెందిన 'ఇస్లామిక్ రెసిస్టెన్స్ ఇన్ ఇరాక్' అనే సాయుధ సంస్థ అమెరికా అధ్యక్షుడు డొనాల్డ్ ట్రంప్ను లక్ష్యంగా చేసుకుంటూ సంచలన ప్రకటన విడుదల చేసింది. ట్రంప్ను అంతం చేసిన వారికి 10 మిలియన్ అమెరికన్ డాలర్లు, అంటే సుమారు రూ.85 కోట్లకు పైగా బహుమతి ఇస్తామని ఆ సంస్థ తమ కమ్యూనికేషన్ ఛానెళ్ల ద్వారా వెల్లడించింది. అయితే, ఈ ప్రకటన నిజమైనదా కాదా అనే విషయంపై ఇప్పటివరకు ఎలాంటి స్వతంత్ర ధృవీకరణ లేదు.
అమెరికా ప్రభుత్వం నైతిక విలువలను కోల్పోయిందని, ఖాసిం సొలేమాని మరియు అబూ మహ్దీ అల్-ముహందిస్ వారసత్వాన్ని ట్రంప్ దెబ్బతీస్తున్నారని ఆ సంస్థ ఆరోపించింది. 2020 జనవరిలో బాగ్దాద్ విమానాశ్రయం వద్ద జరిగిన అమెరికా డ్రోన్ దాడిలో సొలేమాని, అల్-ముహందిస్ మరణించారు. అప్పటి నుంచి ఇరాన్ మద్దతు ఉన్న మిలీషియా గ్రూపులు అమెరికా అధికారులపై పలుమార్లు బెదిరింపులకు పాల్పడుతున్నాయి.
ఈ బెదిరింపు ప్రకటనపై వైట్ హౌస్ లేదా అమెరికా అధికార యంత్రాంగం నుంచి ఎటువంటి స్పందన రాలేదు. అయినప్పటికీ, దేశాధినేతలపై వచ్చే ఇటువంటి బహిరంగ హెచ్చరికలను భద్రతా సంస్థలు తీవ్రంగా పరిగణిస్తాయి. ప్రస్తుతం ఈ అంశంపై సంబంధిత భద్రతా సంస్థలు నిశితంగా నిఘా ఉంచినట్లు అంతర్జాతీయ వర్గాలు పేర్కొంటున్నాయి.
