పెద్దగా స్టార్ క్యాస్ట్ లేకపోయినా, కంటెంట్తో ప్రేక్షకులను ఆకట్టుకునే ప్రయత్నం చేసింది ‘హుషార్ పిట్టలు’. ఏషియన్ సురేష్ ఎంటర్టైన్మెంట్స్ ఈ సినిమాను విడుదల చేస్తుండటంతో దీనిపై కొంత ఫోకస్ పెరిగింది. పద్మ అమ్మ, బీవీజీ స్టూడియోస్ సమర్పణలో రుద్ర క్రాంతి పిక్చర్స్ బ్యానర్పై వెంకట్ యాదవ్ ఈ చిత్రాన్ని నిర్మించారు.
కథ విషయానికి వస్తే, చదువులో ముందుండే రవి, అదే ఊరికి చెందిన చిట్టి ప్రేమలో పడతారు. స్నేహితుల ప్రోద్బలంతో అడల్ట్ వీడియోలు చూసి, తెలిసీ తెలియని వయసులో వారు హద్దులు దాటి శృంగారంలో మునిగిపోతారు. ఈ తప్పు వల్ల వారి జీవితాలు ఎలాంటి మలుపులు తిరిగాయి, తల్లిదండ్రులు ఎలా స్పందించారనేదే మిగతా కథ.
సినిమా ఫస్ట్ హాఫ్ అంతా డబుల్ మీనింగ్ డైలాగులు, అడల్ట్ కామెడీతో సాగుతుంది. అయితే సెకండ్ హాఫ్లో పిల్లల పెంపకం, మొబైల్ ఫోన్లు, చెడు సావాసాల వల్ల కలిగే దుష్ప్రభావాలను దర్శకుడు ప్రాక్టికల్గా చూపించారు. ఎమోషనల్ సీన్లలో అన్ష్, వాసవి గణేషన్ మెచ్యూర్డ్ నటనతో ఆకట్టుకోగా, తండ్రి పాత్రలో గోవర్ధన్ భావోద్వేగాలను పండించారు.
సాంకేతికంగా పాటలు, నేపథ్య సంగీతం సినిమాకు బలాన్నిచ్చాయి. ఎడిటింగ్ విభాగం మరికొన్ని అడల్ట్ సన్నివేశాలను తగ్గించి ఉంటే బాగుండేది. డబుల్ మీనింగ్ కామెడీని తట్టుకోగలిగితే, నేటి తరం యువతతో పాటు తల్లిదండ్రులు కూడా చూడాల్సిన సినిమా ఇది.
