ఏపీ సీఎం చంద్రబాబు నాయుడు టీడీపీ ముఖ్యనేతలతో నిర్వహించిన టెలికాన్ఫరెన్స్లో కీలక వ్యాఖ్యలు చేశారు. వైసీపీ నేతలతో ఎట్టి పరిస్థితుల్లోనూ వేదికలు పంచుకోవద్దని ఆయన పార్టీ నేతలను ఆదేశించారు. ఆ పార్టీ ట్రాప్లో పడొద్దని హెచ్చరించిన చంద్రబాబు, తనకు కావాల్సింది అనుచరులు కాదని, పార్టీకి నాయకులు కావాలని స్పష్టం చేశారు.
కూటమి ప్రభుత్వం చేపట్టిన రెండేళ్ల పాలనను ప్రజల్లోకి తీసుకెళ్లేందుకు రేపటి నుంచి 45 రోజుల పాటు 'టీడీపీ టు డోర్' కార్యక్రమాన్ని చేపట్టనున్నట్లు ఆయన తెలిపారు. మంత్రులు, ఎంపీలు, పార్టీ యంత్రాంగం మొత్తం ఈ అవుట్ రీచ్ కార్యక్రమంలో పాల్గొనాలని సూచించారు. ప్రభుత్వం ఇచ్చిన హామీల అమలును ప్రతి ఇంటికి వివరించాలని, ప్రజల అనుమానాలను నివృత్తి చేయాలని దిశానిర్దేశం చేశారు.
వైసీపీ నిత్యం కులమతాలను అడ్డం పెట్టుకుని విద్వేషాలు రగిలిస్తోందని చంద్రబాబు ఆరోపించారు. ఆ పార్టీని ఒక విష వృక్షంగా అభివర్ణించిన ఆయన, వైసీపీ విధ్వంసకర విధానాలను, యువతను ఆ పార్టీ ఎలా మోసం చేసిందో ప్రజలకు అర్థమయ్యేలా చెప్పాలని కోరారు. డబ్బుతో ప్రజాభిమానాన్ని పొందలేమని, ఓటమి తర్వాత కూడా ఆ పార్టీ సమాజంలో చిచ్చు రాజేస్తోందని ఆయన విమర్శించారు.
రాబోయే స్థానిక ఎన్నికల్లో అన్ని స్థానాలను గెలుచుకోవాలని చంద్రబాబు లక్ష్యంగా పెట్టుకున్నారు. కూటమి పార్టీల అభ్యర్థుల గెలుపు కోసం ప్రతి ఒక్కరూ కష్టంతో కాకుండా ఇష్టంతో పనిచేయాలని, ప్రజలు మరియు కార్యకర్తలతో సన్నిహితంగా ఉండాలని ఆయన సూచించారు.
