విజయవాడ మెట్రో రైల్ ప్రాజెక్టును వేగవంతం చేసే దిశగా ఆంధ్రప్రదేశ్ ప్రభుత్వం అడుగులు వేస్తోంది. ప్రాజెక్టు కోసం అవసరమైన భూమిని సేకరించే క్రమంలో, సామాజిక ప్రభావ మదింపు (SIA) అధ్యయనాన్ని చేపట్టేందుకు అధికారులు సిద్ధమయ్యారు. ఇందులో భాగంగా విజయవాడ సబ్ కలెక్టర్ కార్యాలయంలో శుక్రవారం ఒక సమన్వయ సమావేశం జరిగింది.
జిల్లా కలెక్టర్ ఆదేశాల మేరకు, ప్రభుత్వం నియమించిన ఎస్ఐఏ సంస్థ మరియు అడ్మినిస్ట్రేటివ్ స్టాఫ్ కాలేజ్ ఆఫ్ ఇండియా ప్రతినిధులు ఈ సమావేశాన్ని నిర్వహించారు. రిటైర్డ్ ఐఏఎస్ అధికారి బి. ఉదయలక్ష్మి అధ్యక్షతన జరిగిన ఈ భేటీలో, ఎన్టీఆర్ జిల్లాలోని నాలుగు మండలాలు, కృష్ణా జిల్లాలోని రెండు మండలాల్లో చేపట్టాల్సిన ఫీల్డ్ సర్వేలు, ప్రజాభిప్రాయ సేకరణ మరియు సిబ్బంది నియామకం వంటి అంశాలపై చర్చించారు.
ఈ భూసేకరణ ప్రక్రియలో రెవెన్యూ డివిజనల్ అధికారులు, తహశీల్దారులు, మెట్రో రైల్ ప్రాజెక్టు అధికారులు పాల్గొన్నారు. ప్రాజెక్టుకు అవసరమైన భూసేకరణను పారదర్శకంగా, నిర్దేశిత గడువులోగా పూర్తి చేయాలని ఉన్నతాధికారులు సూచించారు. ఈ ప్రక్రియలో ప్రజల భాగస్వామ్యం అత్యంత కీలకమని వారు స్పష్టం చేశారు.
భవిష్యత్తులో గ్రామ సభలు, వార్డు స్థాయి సమావేశాలను నిర్ణీత ప్రదేశాల్లో నిర్వహించనున్నట్లు అధికారులు తెలిపారు. ఈ సమావేశాల తేదీలను ముందుగానే ప్రజలకు తెలియజేయనున్నారు. స్థానిక ప్రజలు, ప్రజాప్రతినిధులు, భూ యజమానులు ఈ సమావేశాలకు హాజరై తమ అభిప్రాయాలు, అభ్యంతరాలను తెలియజేయాలని కోరారు. ప్రజల నుంచి సేకరించిన సమాచారాన్ని పరిగణనలోకి తీసుకుని, తుది సామాజిక ప్రభావ మదింపు నివేదికను సిద్ధం చేయనున్నారు.
