విజయ డెయిరీ ఛైర్మన్ పదవి నుంచి చలసాని ఆంజనేయులు తప్పుకున్నారు. మంత్రులు కొల్లు రవీంద్ర, కొలుసు పార్ధసారథి ఒత్తిడి చేయడంతో ఆయన ఈ నిర్ణయం తీసుకున్నారు. పార్టీ అధిష్టానం ఆదేశాల మేరకే రాజీనామా చేయాల్సి వచ్చిందని మంత్రి పార్ధసారథి ప్రకటించారు.
బుధవారం సాయంత్రం జరిగిన సమావేశం తర్వాత మంత్రులు కొల్లు రవీంద్ర, పార్ధసారథి విజయ డెయిరీ కార్యాలయానికి చేరుకున్నారు. పదవికి రాజీనామా చేయాలని వారు ఆంజనేయులపై ఒత్తిడి తెచ్చారు. నిర్ణయం తీసుకోవడానికి ఒక్కరోజు గడువు కావాలని ఆంజనేయులు కోరినప్పటికీ, మంత్రులు అందుకు అంగీకరించలేదు.
ఈ పరిణామాల మధ్య తీవ్ర ఒత్తిడికి లోనైన చలసాని ఆంజనేయులు అస్వస్థతకు గురయ్యారు. దీంతో ఆయనను వెంటనే ప్రైవేట్ ఆసుపత్రికి తరలించారు. ఆసుపత్రిలో చికిత్స పొందుతున్న సమయంలో కూడా మంత్రులు ఆయనను కలిసి రాజీనామా చేయాలని ఒత్తిడిని కొనసాగించారు.
రెండు గంటల పాటు ఆసుపత్రిలో చర్చలు జరిపిన తర్వాత, మంత్రుల ఒత్తిడికి తలొగ్గి చలసాని ఆంజనేయులు తన రాజీనామాను సమర్పించారు. పార్టీ ఆదేశాల మేరకు ఈ మార్పు జరిగిందని మంత్రి పార్ధసారథి వెల్లడించారు.
