రాష్ట్రంలో విద్యా రంగాన్ని ఆధునీకరించేందుకు ప్రభుత్వం ప్రత్యేక చర్యలు తీసుకుంటోందని సీఎం రేవంత్ రెడ్డి వెల్లడించారు. విద్యతో పాటు నైపుణ్య శిక్షణకు ప్రాధాన్యత ఇస్తున్నామని, ప్రపంచంతో పోటీ పడేలా విద్యార్థులను తీర్చిదిద్దడమే తమ లక్ష్యమని ఆయన పేర్కొన్నారు. విద్యా రంగానికి సంబంధించిన సంస్కరణలపై అధ్యయనం చేసేందుకు ఇప్పటికే విద్యా కమిషన్ను ఏర్పాటు చేశామని, కమిషన్ సభ్యుల సూచనలను పరిగణనలోకి తీసుకుంటామని తెలిపారు.
విద్యాశాఖపై తాను సమీక్ష నిర్వహిస్తే, అది సీఎం సమీక్ష అని విమర్శలు వస్తున్నాయని రేవంత్ రెడ్డి ప్రస్తావించారు. పూర్తిస్థాయి విద్యాశాఖ మంత్రి లేరని కొందరు అంటున్నప్పటికీ, పేదలకు మేలు జరగాలనే ఉద్దేశంతోనే ఆ శాఖను తన వద్దే ఉంచుకున్నానని ఆయన స్పష్టం చేశారు. డాక్టర్ బీఆర్ అంబేద్కర్ చూపిన మార్గంలోనే పేద, దళిత వర్గాల అభ్యున్నతికి చదువే ప్రధాన మార్గమని ఆయన అభిప్రాయపడ్డారు.
ప్రభుత్వం విద్యాశాఖకు బడ్జెట్ కేటాయింపులను క్రమంగా పెంచుతోంది. 2023-24లో 6.53 శాతం కేటాయించగా, 2024-25లో 7 శాతానికి, 2025-26లో 8 శాతానికి పైగా నిధులను పెంచినట్లు సీఎం వివరించారు. గత మూడేళ్లలో విద్యాశాఖ కోసం రూ. 7,554 కోట్లు అదనంగా ఖర్చు చేశామని, 2026-27 ఆర్థిక సంవత్సరానికి రూ. 27,663 కోట్లు కేటాయించామని ఆయన తెలిపారు.
రాష్ట్రంలో ప్రస్తుతం 24,966 ప్రభుత్వ పాఠశాలలు ఉండగా, వాటిలో 19,79,614 మంది విద్యార్థులు చదువుకుంటున్నారని సీఎం గణాంకాలను వివరించారు. 1,24,456 మంది ఉపాధ్యాయులు పనిచేస్తున్నారని, అలాగే 444 ఇంటర్మీడియట్ కళాశాలల్లో సుమారు 1.95 లక్షల మంది విద్యార్థులు ఉన్నారని పేర్కొన్నారు. ప్రతి మూడు కిలోమీటర్ల పరిధిలో ప్రాథమిక పాఠశాల ఉండేలా వ్యవస్థను బలోపేతం చేయాల్సిన అవసరం ఉందని ఆయన చెప్పారు.
గతంలో కొన్ని సామాజిక వర్గాలు సంప్రదాయ వృత్తులకే పరిమితమై చదువుకు దూరమయ్యాయని సీఎం వ్యాఖ్యానించారు. నెహ్రూ వేసిన పునాదులపైనే ప్రస్తుత విద్యాసంస్థలు నడుస్తున్నాయని, వైఎస్సార్ హయాంలో ప్రతి జిల్లాకు ఒక యూనివర్సిటీని ఏర్పాటు చేశారని ఆయన గుర్తు చేశారు. విద్యారంగంలో మరిన్ని సంస్కరణల కోసం అన్ని వర్గాల నుంచి సూచనలు తీసుకుంటామని, తద్వారా తెలంగాణను దేశానికే ఆదర్శంగా నిలుపుతామని సీఎం రేవంత్ రెడ్డి తెలిపారు.
