ఉత్తర కోల్కతాలోని కుమ్మర్టోలికి చెందిన కళాకారులు అంతర్జాతీయ వేదికలపై దుర్గా పూజ కోసం ప్రత్యేక విగ్రహాలను తయారు చేస్తున్నారు. గత ఏడాది 18 ఆర్డర్లు రాగా, ఈసారి ఆ సంఖ్య 20కి పెరిగింది. అమెరికా, కెనడా, జర్మనీ, ఇటలీ, ఫ్రాన్స్, న్యూజిలాండ్, ఉగాండా మరియు దుబాయ్ వంటి దేశాల నుంచి ఈ ఆర్డర్లు వచ్చాయి.
సుదూర ప్రాంతాలకు రవాణా చేసేటప్పుడు విగ్రహాలు దెబ్బతినకుండా ఉండేందుకు కళాకారులు ఫైబర్గ్లాస్ను ఉపయోగిస్తున్నారు. ఇప్పటికే ఆరు విగ్రహాలను అమెరికాకు పంపగా, మిగిలిన వాటిని సిద్ధం చేసే పనిలో కళాకారులు నిమగ్నమై ఉన్నారు.
విగ్రహాల పరిమాణాన్ని బట్టి ధరలు నిర్ణయించారు. 5 నుంచి 7 అడుగుల ఎత్తు ఉన్న ఫైబర్గ్లాస్ విగ్రహం ధర సుమారు రూ. 1.5 లక్షల నుంచి రూ. 2 లక్షల వరకు ఉంటుంది. ఒకవేళ విగ్రహం 7 అడుగుల కంటే ఎక్కువ ఎత్తు ఉంటే, దాని ధర సుమారు రూ. 3 లక్షల వరకు ఉంటుందని కళాకారులు పేర్కొన్నారు.
ప్రపంచవ్యాప్తంగా పెరుగుతున్న దుర్గా పూజ వేడుకల నేపథ్యంలో కుమ్మర్టోలిలో కళాకారుల పని ఒత్తిడి పెరిగింది. ఆర్డర్లను సకాలంలో పూర్తి చేసి, విదేశాలకు పంపేందుకు వారు తీవ్రంగా శ్రమిస్తున్నారు.
