వందేమాతరం గేయంలోని మొదటి రెండు చరణాలను మాత్రమే పాడాలని కాంగ్రెస్ వర్కింగ్ కమిటీ ఆగస్టు 19న నిర్ణయించింది. 1937లో తీసుకున్న తీర్మానం ప్రకారమే ఈ నిర్ణయం తీసుకున్నట్లు ఆ పార్టీ పేర్కొంది. అయితే, ఈ నిర్ణయాన్ని బీజేపీ తీవ్రంగా వ్యతిరేకించింది.
బీజేపీ జాతీయ అధ్యక్షుడు నితిన్ నబీన్ అధ్యక్షతన జరిగిన కొత్త కార్యవర్గ సమావేశంలో ఈ మేరకు ఒక తీర్మానాన్ని ఆమోదించారు. రాజకీయ ప్రయోజనాల కోసం లేదా బుజ్జగింపు రాజకీయాల కోసం జాతీయ గీతం గౌరవంలో ఎలాంటి రాజీ పడబోమని ఆయన స్పష్టం చేశారు. ఈ వివరాలను ఆయన ‘ఎక్స్’ సామాజిక మాధ్యమం ద్వారా పంచుకున్నారు.
పార్లమెంటు ఉభయసభలు జులై 20న ‘జాతీయ గౌరవ అవమాన నిరోధక చట్టం-2026’ను ఆమోదించాయి. ఈ చట్టం ప్రకారం వందేమాతరం ఆలపించడాన్ని ఎవరైనా ఉద్దేశపూర్వకంగా అడ్డుకున్నా లేదా అంతరాయం కలిగించినా అది నేరం అవుతుంది. ఇలాంటి వారికి గరిష్ఠంగా మూడేళ్ల జైలు శిక్ష, జరిమానా లేదా రెండూ విధించే అవకాశం ఉందని చట్టం చెబుతోంది.
1937 నాటి రాజకీయ రాజీని 1950లో ఏర్పడిన రాజ్యాంగ వ్యవస్థ కంటే, 2026లో పార్లమెంటు ఆమోదించిన చట్టాల కంటే ఉన్నతంగా పరిగణించలేమని నబీన్ పేర్కొన్నారు. కాంగ్రెస్ నిర్ణయం దేశంలోని రాజ్యాంగ సంస్థలను, చట్టాలను అధిగమించలేదని ఆయన స్పష్టం చేశారు.
వందేమాతరం ప్రాధాన్యతను చాటిచెప్పేలా దేశవ్యాప్తంగా ప్రచార కార్యక్రమాలు చేపట్టాలని బీజేపీ నిర్ణయించింది. మహాత్మాగాంధీ వందేమాతరాన్ని సామ్రాజ్యవాద వ్యతిరేక నినాదంగా ఎలా అభివర్ణించారో యువతకు వివరించనున్నారు. స్వాతంత్య్ర పోరాట జ్ఞాపకాలను, ఆరు చరణాలతో కూడిన పూర్తి గీత చరిత్రను భవిష్యత్ తరాలకు తెలియజేయడమే తమ లక్ష్యమని నబీన్ తెలిపారు.
