తేని జిల్లా ఆండిపట్టి ప్రభుత్వ ఆసుపత్రిలో నర్సుగా పనిచేసే 48 ఏళ్ల సెల్వి, 2021 నవంబర్ 24న తన ఇంట్లో దారుణంగా హత్యకు గురైంది. భర్తతో విడిపోయి ఒంటరిగా ఉంటున్న ఆమె, అద్దె ఇంట్లో నివసిస్తుండగా ఈ ఘటన జరిగింది. దాదాపు ఐదేళ్ల సుదీర్ఘ దర్యాప్తు తర్వాత ఈ కేసులో కీలక ఆధారాలు లభించాయి.
పోలీసులు సెల్వి ఇంటిని సోదా చేసినప్పుడు, అక్కడ 500 హై క్వాలిటీ కండోమ్స్ (గర్భనిరోధక సాధనాలు) లభించాయి. ఆమె ఫోన్ కాల్ డేటాను పరిశీలించగా, సుమారు 300 మంది పురుషులతో ఆమె పరిచయాలు ఉన్నట్లు గుర్తించారు. వీరిలో 150 మందితో ఆమె వివాహేతర సంబంధాలు కొనసాగిస్తోందని, వారిలో పోలీసులు, డాక్టర్లు, ఆటో డ్రైవర్లు వంటి వివిధ వర్గాల వారు ఉన్నారని దర్యాప్తులో తేలింది.
ఈ కేసులో కంబం ప్రభుత్వ ఆసుపత్రిలో పనిచేసే రామచంద్రప్రభుపై పోలీసులకు అనుమానం కలిగింది. విచారణకు హాజరు కావాలని అతనికి నోటీసులు పంపిన మరుసటి రోజే, అతను విషం తాగి ఆత్మహత్య చేసుకున్నాడు. గతంలో సెల్వి, రామచంద్రప్రభు ఒకే ఆసుపత్రిలో పనిచేసినప్పుడు వారి మధ్య పరిచయం ఏర్పడి, అది వివాహేతర సంబంధానికి దారితీసింది.
హత్య జరిగిన రోజు రామచంద్రప్రభు సెల్వి ఇంటికి వచ్చి వెళ్లినట్లు సీసీటీవీ ఫుటేజీలో నమోదైంది. అదే రోజు సాయంత్రం సెల్వి బంగారు గొలుసును అతను తాకట్టు దుకాణంలో కుదవపెట్టినట్లు పోలీసులు ఆధారాలు సేకరించారు. ఘటనా స్థలంలో దొరికిన పాదముద్రలు కూడా రామచంద్రప్రభువేనని ఫోరెన్సిక్ పరీక్షల్లో నిర్ధారణ అయింది.
రామచంద్రప్రభు భార్యను విచారించగా, సెల్వికి తన భర్త లక్షల రూపాయలు అప్పుగా ఇచ్చాడని ఆమె తెలిపింది. ఆ డబ్బు తిరిగి ఇవ్వాలని రామచంద్రప్రభు ఒత్తిడి చేయడంతో వారి మధ్య గొడవలు జరిగాయని, ఆ క్రమంలోనే క్షణికావేశంలో అతను సెల్విని హత్య చేశాడని ఆమె అంగీకరించింది. అరెస్ట్ భయంతోనే నిందితుడు ఆత్మహత్య చేసుకున్నాడని పోలీసులు స్పష్టం చేశారు.
