తెలుగు సినిమాలో తెలంగాణ యాస, జానపదాలకు (Telangana Folk Songs) ఇప్పుడు మంచి రోజులు వచ్చాయి. గతంలో విలన్లు, చిన్న పాత్రలకే పరిమితమైన ఈ ప్రాంత భాషకు ఇప్పుడు సినిమాల్లో పెద్ద పీట వేస్తున్నారు. కథలో భాగంగా తెలంగాణ సంప్రదాయాలను, పల్లె పదాలను దర్శకులు కథానాయకుల పాటల్లో వాడుతున్నారు.
నేచురల్ స్టార్ నాని నటిస్తున్న 'Paradise' సినిమాలో ‘యెష నాగుల కట్ట మీద యేసిన ఉయ్యాల’ అనే జానపద పాటను తీసుకున్నారు. ఈ సినిమాకు శ్రీకాంత్ ఓదెల దర్శకత్వం వహిస్తున్నారు. తాజాగా విడుదలైన ఈ పాట లిరికల్ వీడియోలో నాని, కీర్తి సురేశ్ వేసిన మాస్ స్టెప్పులు ప్రేక్షకులను ఆకట్టుకుంటున్నాయి.
గతంలో వచ్చిన ‘లవ్ స్టోరీ’ సినిమాలో ‘సారంగదరియా’ పాట బ్లాక్బస్టర్ విజయాన్ని అందుకుంది. శేఖర్ కమ్ముల దర్శకత్వంలో నాగచైతన్య హీరోగా నటించిన ఈ చిత్రంలో, సాయి పల్లవి నృత్యం ఈ పాటకు మరింత బలాన్ని ఇచ్చింది. అలాగే ‘అల వైకుంఠపురములో’ చిత్రంలో మంగ్లీ పాడిన ‘రాములో రాముల’ పాట యూట్యూబ్లో 79 కోట్లకు పైగా వ్యూస్ను సాధించింది. కాసర్య శ్యామ్ రాసిన ఈ పాటకు అల్లు అర్జున్, పూజా హెగ్డే డ్యాన్స్ చేశారు.
ఇతర సినిమాల్లో కూడా ఈ జానపదాల ట్రెండ్ కనిపిస్తోంది. చిరంజీవి ‘భోళా శంకర్’ చిత్రంలో ‘నర్సపల్సి గండిలోన’ పాటను, రవితేజ ‘రాజా ది గ్రేట్’ సినిమాలో ‘గున్నా గున్నా మామిడి’ పాటను వాడారు. వేణు ఎల్డండి దర్శకత్వంలో వచ్చిన ‘బలగం’ సినిమా తెలంగాణ పల్లె పదాల గొప్పతనాన్ని చాటి చెప్పి పెద్ద హిట్గా నిలిచింది.
ఒకప్పుడు టేపు రికార్డర్లలో మాత్రమే వినిపించిన ఈ పాటలు, ఇప్పుడు యూట్యూబ్ ఛానెళ్ల ద్వారా కొత్త తరానికి చేరువయ్యాయి. కథకు తగినట్లుగా ఈ జానపదాలను ఎంచుకుంటూ, స్వరకర్తలు కొత్త బాణీలు కడుతున్నారు. ఈ తరహా పాటలు ఇప్పుడు సినిమా హిట్ ఫార్ములాలో ఒక భాగంగా మారిపోయాయి.
