కడపలో బుధవారం జరిగిన క్రికెట్ మ్యాచ్లో విజయవాడ సన్షైనర్స్ జట్టు తుంగభద్ర వారియర్స్పై 19 పరుగుల తేడాతో విజయం సాధించింది. ఆద్యంతం ఉత్కంఠభరితంగా సాగిన ఈ పోరులో విజయవాడ జట్టు నిర్ణీత 20 ఓవర్లలో 6 వికెట్లు కోల్పోయి 198 పరుగులు చేసింది. దీనికి సమాధానంగా బ్యాటింగ్కు దిగిన తుంగభద్ర వారియర్స్ 20 ఓవర్లలో 8 వికెట్లు నష్టపోయి 179 పరుగులు మాత్రమే సాధించి ఓటమి పాలైంది.
భారత క్రికెట్ నియంత్రణ మండలి (బీసీసీఐ) సభ్యురాలు చాముండేశ్వరి నాథ్ టాస్ వేసి ఈ సీజన్ను అధికారికంగా ప్రారంభించారు. టాస్ గెలిచిన విజయవాడ సన్షైనర్స్ కెప్టెన్ అశ్విన్ హెబ్బార్ మొదట బ్యాటింగ్ ఎంచుకున్నాడు. ఓపెనర్గా వచ్చిన అశ్విన్ హెబ్బార్ 48 బంతుల్లో 9 ఫోర్లు, 4 సిక్సర్ల సహాయంతో 85 పరుగులు చేసి జట్టుకు బలమైన పునాది వేశాడు. అతనికి తోడుగా మిడిల్ ఆర్డర్ బ్యాట్స్మెన్ జహీర్ అబ్బాస్ 25 బంతుల్లో 3 ఫోర్లు, 4 సిక్సర్లతో 52 పరుగులు చేసి హాఫ్ సెంచరీ సాధించాడు. తుంగభద్ర బౌలర్లలో దీపక్, హిమ శ్రీనివాస్ చెరో రెండు వికెట్లు తీశారు.
199 పరుగుల భారీ లక్ష్యంతో బరిలోకి దిగిన తుంగభద్ర వారియర్స్కు విజయవాడ బౌలర్ భరత్ ఎదురుదెబ్బ తగిలించాడు. తుంగభద్ర ఓపెనర్ సమన్యు 24 బంతుల్లో 7 ఫోర్లు, 3 సిక్సర్లతో 51 పరుగులు చేసి రాణించాడు. సత్యనారాయణ 21 బంతుల్లో 4 ఫోర్లు బాదగా, మ్యాచ్ చివరిలో సౌరవ్కుమార్ 15 బంతుల్లో 2 ఫోర్లు, 2 సిక్సర్లతో 24 పరుగులు చేశాడు. అయినప్పటికీ విజయవాడ బౌలర్ భరత్ 4 కీలక వికెట్లు పడగొట్టగా, సుమిత్ 2 వికెట్లు తీయడంతో తుంగభద్ర జట్టు గెలుపు లక్ష్యాన్ని చేరుకోలేకపోయింది.
మ్యాచ్లో అత్యుత్తమ ప్రదర్శన కనబరిచిన విజయవాడ సన్షైనర్స్ బ్యాటర్ అశ్విన్ హెబ్బార్ను 'ప్లేయర్ ఆఫ్ ది మ్యాచ్'గా ఎంపిక చేశారు. కడప వేదికగా జరిగిన ఈ తొలి పోరులో విజయవాడ జట్టు ఘన విజయంతో సీజన్ను ప్రారంభించింది.
