సింగరేణిలోని 11 ఏరియాల్లో 100 మస్టర్ల కంటే తక్కువ హాజరు ఉన్న 200 మంది కార్మికులను డిస్మిస్ (ఉద్యోగం నుంచి తొలగించడం) చేసేందుకు యాజమాన్యం కసరత్తు చేస్తోంది. ఈ మేరకు యాజమాన్యం ఒక సర్క్యులర్ విడుదల చేసింది. రాబోయే ఒకటి రెండు నెలల్లో మరో 400 మందిపై కూడా వేటు వేసేందుకు సిద్ధమవుతున్నట్లు తెలుస్తోంది.
గతంలో అనారోగ్యం, ప్రమాదాలు, కుటుంబ సమస్యల వంటి కారణాలను మానవతా దృక్పథంతో పరిశీలించి, విచారణ జరిపిన తర్వాతే యాజమాన్యం చర్యలు తీసుకునేది. అయితే, ఇప్పుడు అలాంటి సానుభూతిని పక్కనపెట్టి కేవలం హాజరు ఆధారంగానే జీవనోపాధిని దెబ్బతీసే కఠిన నిర్ణయాలను ప్రభుత్వం, యాజమాన్యం అమలు చేస్తున్నాయని కార్మికులు ఆరోపిస్తున్నారు. బీఆర్ఎస్ పదేళ్ల పాలనలో ఒక్క కార్మికుడిని కూడా తొలగించలేదని, కానీ ఇప్పుడు కాంగ్రెస్ ప్రభుత్వం ఈ చర్యలకు దిగుతోందని విమర్శలు వస్తున్నాయి.
కొత్తగూడెం, భూపాలపల్లి, శ్రీరాంపూర్ వంటి ప్రాంతాల్లో తొలగించాల్సిన కార్మికుల జాబితాను ఇప్పటికే యాజమాన్యం సిద్ధం చేసింది. ఈ నిర్ణయంపై కార్మికులు, కార్మిక సంఘాలకు సమాచారం అందినట్లు తెలుస్తోంది. గుర్తింపు పొందిన సంఘాలు ఈ విషయంలో మౌనంగా ఉన్నాయని కార్మికులు అసహనం వ్యక్తం చేస్తున్నారు.
ఈ కఠిన చర్యలను నిలిపివేయాలని, లేనిపక్షంలో సింగరేణి వ్యాప్తంగా ఉద్యమాన్ని తీవ్రతరం చేస్తామని కార్మిక సంఘాలు హెచ్చరిస్తున్నాయి. కార్మికుల నుంచి వస్తున్న స్పందనను బట్టి, భవిష్యత్తులో తొలగింపుల సంఖ్యపై యాజమాన్యం ఎలాంటి నిర్ణయం తీసుకుంటుందనేది వేచి చూడాలి.
