2026 ఫిఫా (FIFA) ప్రపంచకప్లో అర్జెంటీనా జట్టుకు అనుకూలంగా ఫిఫా వ్యవహరించిందని ఆరోపిస్తూ సామాజిక మాధ్యమాల్లో ఒక పోస్ట్ చక్కర్లు కొట్టింది. ఈ పోస్ట్ను పోర్చుగల్ స్టార్ ఫుట్బాలర్ క్రిస్టియానో రొనాల్డో తన అధికారిక ఇన్స్టాగ్రామ్ ఖాతా ద్వారా లైక్ చేశారనే స్క్రీన్షాట్ ఎక్స్, ఫేస్బుక్, ఇన్స్టాగ్రామ్లలో విస్తృతంగా షేర్ అయింది. అర్జెంటీనా ఫైనల్ చేరడంలో వివాదాస్పద రెఫరీ నిర్ణయాలు కీలక పాత్ర పోషించాయని ఆ పోస్ట్ పేర్కొంది.
అయితే, ఈ వైరల్ స్క్రీన్షాట్ను క్షుణ్ణంగా పరిశీలించగా అది పూర్తిగా అబద్ధమని స్పష్టమైంది. రొనాల్డో ఖాతా నుండి అటువంటి లైక్ ఏదీ నమోదు కాలేదని ఇన్స్టాగ్రామ్ డేటా ద్వారా నిర్ధారణ అయింది. సోషల్ మీడియాలో కనిపిస్తున్న ఆ చిత్రం ఎడిటింగ్ ద్వారా సృష్టించిన నకిలీదని విశ్లేషణలో తేలింది.
ఈ వివాదాస్పద అంశంపై రొనాల్డో కానీ, ఆయన బృందం కానీ ఇప్పటివరకు ఎలాంటి అధికారిక ప్రకటన చేయలేదు. ఏ విశ్వసనీయ మీడియా సంస్థ కూడా ఈ ప్రచారాన్ని ధ్రువీకరించలేదు. సరైన ఆధారాలు లేకపోవడంతో ఈ వార్తలో నిజం లేదని స్పష్టమవుతోంది.
ఈ ప్రపంచకప్లో పోర్చుగల్ జట్టు రౌండ్ ఆఫ్ 16లో స్పెయిన్ చేతిలో ఓడి టోర్నీ నుండి నిష్క్రమించింది. లియోనెల్ మెస్సీ, నేమార్, రొనాల్డో వంటి దిగ్గజ ఆటగాళ్లకు ఇదే చివరి ప్రపంచకప్ కావచ్చనే చర్చ జరుగుతున్న వేళ, ఇటువంటి నిరాధారమైన వివాదాలు తెరపైకి రావడం గమనార్హం.
