ప్రధాని నరేంద్ర మోదీపై సామాజిక మాధ్యమాల్లో అసభ్యకర పోస్టులు పెట్టిన వారిపై నమోదైన కేసుల క్రెడిట్ను సీఎం రేవంత్ రెడ్డి తన ఖాతాలో వేసుకోవడంపై బీజేపీ రాష్ట్ర నాయకులు ఎన్.రాంచందర్ రావు తీవ్ర అభ్యంతరం వ్యక్తం చేశారు. ఈ కేసులను తమ పార్టీ కార్యకర్తల చొరవతోనే పోలీసులు నమోదు చేశారని, ఇందులో కాంగ్రెస్ ప్రభుత్వానికి ఎటువంటి సంబంధం లేదని ఆయన స్పష్టం చేశారు.
ఈ వ్యవహారంలో రేవంత్ సర్కార్ ద్వంద్వ వైఖరిని రాంచందర్ రావు ఎండగట్టారు. ఒకవైపు కేసుల నమోదు ఘనత తనదేనని చెప్పుకుంటూనే, మరోవైపు ఎఫ్ఐఆర్ (FIR) నమోదు చేసిన సైబర్ క్రైమ్ డీసీపీ అరవింద్ బాబును మరుసటి రోజే బదిలీ చేయడంపై ఆయన ప్రశ్నించారు. తన బాధ్యతను సక్రమంగా నిర్వర్తించిన అధికారిని ఎందుకు తప్పించారో సమాధానం చెప్పాలని డిమాండ్ చేశారు.
అధికారులను శిక్షించడం, ఆపై వారి పనిని తమ ఘనతగా చెప్పుకోవడం కాంగ్రెస్ ‘బనానా రిపబ్లిక్’ పాలనకు నిదర్శనమని రాంచందర్ రావు విమర్శించారు. ఇష్టానుసారంగా బదిలీలు చేయడం ద్వారా అధికారుల మనోధైర్యాన్ని ప్రభుత్వం దెబ్బతీస్తోందని ఆయన ఆరోపించారు.
