బీఆర్ఎస్ వర్కింగ్ ప్రెసిడెంట్ కేటీఆర్ పీఏ (పర్సనల్ అసిస్టెంట్) మహేందర్ రెడ్డి, పీఆర్వో (పబ్లిక్ రిలేషన్స్ ఆఫీసర్) మహేష్పై సుమారు 15 మంది వ్యక్తులు దాడి చేశారు. పోలీసుల సమక్షంలోనే ఈ ఘటన జరగడం అమానవీయమని తెలంగాణ ఫుడ్స్ మాజీ చైర్మన్ మేడే రాజీవ్ సాగర్ విమర్శించారు.
రాజకీయ కక్షతోనే వీరిపై అక్రమ కేసులు నమోదు చేశారని ఆయన ఆరోపించారు. పండుగ రోజున విచారణ పేరుతో పోలీస్ స్టేషన్కు పిలిపించి, చీకటి పడే వరకు అక్కడే ఉంచడం వెనుక కుట్ర ఉందని రాజీవ్ సాగర్ అనుమానం వ్యక్తం చేశారు.
మహేష్, మహేందర్ రెడ్డిలపై హైకోర్టు తదుపరి ఆదేశాలు వచ్చే వరకు ఎలాంటి చర్యలు తీసుకోవద్దని గతంలోనే ఆదేశాలు ఉన్నాయి. కోర్టు ఆదేశాలు ఉన్నప్పటికీ, భద్రత ఉండాల్సిన పోలీస్ స్టేషన్ లోపలికి వెళ్లి దాడి చేయడం రాజకీయ కక్ష సాధింపునకు పరాకాష్ట అని ఆయన పేర్కొన్నారు.
రాష్ట్రంలో కాంగ్రెస్ పాలనలో శాంతిభద్రతలు పూర్తిగా దిగజారాయని రాజీవ్ సాగర్ మండిపడ్డారు. ముఖ్యమంత్రి, హోం మంత్రి హోదాల్లో ఉన్న రేవంత్ రెడ్డి ఈ ఘటనకు బాధ్యత వహించాలని ఆయన డిమాండ్ చేశారు.
పోలీస్ స్టేషన్లో దాడికి పాల్పడిన వ్యక్తులను గుర్తించి కఠిన చర్యలు తీసుకోవాలని రాజీవ్ సాగర్ కోరారు. దాడి చేసిన వారిపై ప్రభుత్వం చర్యలు తీసుకోకపోతే తగిన మూల్యం చెల్లించుకోవాల్సి వస్తుందని ఆయన హెచ్చరించారు.
