రాష్ట్రంలో రాఖీ పౌర్ణమి పండుగ రద్దీని తట్టుకునేందుకు తెలంగాణ రాష్ట్ర రోడ్డు రవాణా సంస్థ (TGSRTC) భారీ ఏర్పాట్లు చేసింది. ఆగస్టు 27 గురువారం నుంచి ఆగస్టు 31 సోమవారం వరకు ప్రయాణికుల కోసం 5,000 ప్రత్యేక బస్సులను నడపనున్నట్లు రవాణా శాఖ మంత్రి పొన్నం ప్రభాకర్ వెల్లడించారు. గత ఏడాది 4,760 బస్సులను నడపగా, ఈసారి రద్దీని అంచనా వేసి అదనంగా మరో 240 బస్సులను పెంచినట్లు ఆయన తెలిపారు.
మిలాద్-ఉన్-నబీ, రాఖీ పౌర్ణమి, ఆదివారం సెలవులు వరుసగా రావడంతో ప్రయాణికుల రద్దీ ముందే మొదలైందని మంత్రి పేర్కొన్నారు. ఆగస్టు 30 మధ్యాహ్నం నుంచి ఆగస్టు 31 వరకు తిరుగు ప్రయాణాల రద్దీ ఎక్కువగా ఉండే అవకాశం ఉందని అధికారులు అంచనా వేస్తున్నారు. రద్దీ ఎక్కువగా ఉండే ప్రాంతాలను ఎప్పటికప్పుడు పర్యవేక్షించి, అవసరమైన చోట అదనపు బస్సులను పంపాలని మంత్రి అధికారులను ఆదేశించారు.
గత ఏడాది ప్రత్యేక బస్సుల్లో 3.68 కోట్ల మంది ప్రయాణించగా, వారిలో 2.51 కోట్ల మంది మహిళలు ఉన్నారు. మహిళా ప్రయాణికులకు రాష్ట్ర ప్రభుత్వం ఉచితంగా బస్సు ప్రయాణ సదుపాయం కల్పించే 'మహాలక్ష్మి' పథకం ఈ పండుగ సమయంలో కూడా యథావిధిగా కొనసాగుతుందని మంత్రి స్పష్టం చేశారు. ప్రయాణికులకు ఎలాంటి ఇబ్బందులు కలగకుండా చూడాలని, ఆర్టీసీ ఉద్యోగులు ఓర్పుతో మెరుగైన సేవలు అందించాలని ఆయన సూచించారు.
రాష్ట్ర ప్రజలకు రాఖీ పౌర్ణమి శుభాకాంక్షలు తెలిపిన మంత్రి, ఈ పండుగ అన్నాచెల్లెళ్ల మధ్య అనుబంధానికి ప్రతీక అని పేర్కొన్నారు. తెలంగాణ ఆడబిడ్డల భద్రతకు, సాధికారతకు తమ ప్రభుత్వం అత్యంత ప్రాధాన్యత ఇస్తోందని ఆయన చెప్పారు. ప్రజలందరూ ఆర్టీసీ బస్సులను వినియోగించుకుని సురక్షితంగా తమ గమ్యస్థానాలకు చేరుకోవాలని మంత్రి కోరారు.
