సాధారణంగా సీనియర్ స్టార్ హీరోల సినిమాల షూటింగ్ పూర్తి కావడానికి ఎక్కువ సమయం పడుతుంది. అయితే, రజినీకాంత్తో అశ్వత్ మారిముత్తు చేస్తున్న సినిమా విషయంలో మాత్రం అందుకు భిన్నంగా వేగంగా పనులు జరుగుతున్నాయి. జూన్లో ప్రారంభమైన ఈ చిత్ర షూటింగ్ను అక్టోబర్ నాటికి పూర్తి చేయాలని దర్శకుడు అశ్వత్ మారిముత్తు లక్ష్యంగా పెట్టుకున్నారు.
‘ధర్మన్: ది డెడ్లీ డాక్టర్’ అనే టైటిల్తో రూపొందుతున్న ఈ సినిమాను కమల్ హాసన్ నిర్మిస్తున్నారు. ఇప్పటికే మొదటి షెడ్యూల్ పూర్తి కాగా, ప్రస్తుతం రెండో షెడ్యూల్ షూటింగ్ కొనసాగుతోంది. ఈ చిత్రంలో సిమ్రాన్, రాశి ఖన్నా హీరోయిన్లుగా నటిస్తుండగా, రామ్ పోతినేని కీలక పాత్రలో కనిపించనున్నట్లు సమాచారం.
తక్కువ సమయంలో సినిమాలను పూర్తి చేయడంలో పేరున్న అనిల్ రావిపూడి తరహాలోనే, అశ్వత్ మారిముత్తు కూడా వేగంగా చిత్రీకరణ జరుపుతుండటం కోలీవుడ్లో చర్చనీయాంశమైంది. పలువురు దర్శకుల పేర్లను పరిశీలించిన తర్వాతే రజినీకాంత్ ఈ ప్రాజెక్టును అశ్వత్కు అప్పగించారు.
వాస్తవానికి అశ్వత్ మారిముత్తు శింబుతో సినిమా చేయాల్సి ఉంది. అయితే, శింబు నటిస్తున్న ‘అరసన్’ షూటింగ్ ఆలస్యం కావడంతో, ముందుగా రజినీకాంత్ ప్రాజెక్టును పట్టాలెక్కించారు. రజినీకాంత్ సినిమా తర్వాత అశ్వత్ శింబుతో తదుపరి ప్రాజెక్టును చేపట్టనున్నారు. అంతేకాకుండా, అశ్వత్ ‘దయానగరం’ అనే సినిమాలో చిన్న పాత్రలో కూడా కనిపించనున్నారు.
