హైదరాబాద్‌లోని సనత్‌నగర్ పుల్లారెడ్డి స్వీట్స్ బ్రాంచ్‌లో ఆహార భద్రతా ప్రమాణాలు పాటిస్తున్నారో లేదో మరోసారి తనిఖీ చేయాలని హైకోర్టు అధికారులను ఆదేశించింది. ఆహార పదార్థాల నాణ్యత, తయారీ ప్రమాణాలను పర్యవేక్షించే ఎఫ్‌ఎస్‌ఎస్‌ఏఐ (FSSAI) నిబంధనల ప్రకారం ఈ తనిఖీలు జరగాలని జస్టిస్ ఎన్.వి. శ్రవణ్ కుమార్ స్పష్టం చేశారు.
తమ లైసెన్స్‌పై ఉన్న సస్పెన్షన్‌ను ఎత్తివేయాలని కోరుతూ పుల్లారెడ్డి స్వీట్స్ యాజమాన్యం బుధవారం లంచ్ మోషన్ పిటిషన్ దాఖలు చేసింది. తనిఖీల్లో గుర్తించిన లోపభూయిష్టమైన పదార్థాలను విక్రయ కేంద్రాలకు పంపడం లేదని, భవిష్యత్తులో కూడా వాటిని వాడబోమని యాజమాన్యం తరఫు న్యాయవాది రఘు కోర్టుకు వివరించారు.
గత నెల 30నే అధికారులకు తాము వివరణ ఇచ్చామని, దీపావళి పండుగ నేపథ్యంలో వ్యాపారానికి అనుమతి ఇవ్వాలని యాజమాన్యం కోరింది. అయితే, ప్రజారోగ్యం దృష్ట్యా ఎఫ్‌ఎస్‌ఎస్‌ఏఐ నిబంధనల మేరకు తనిఖీలు నిర్వహిస్తున్నామని ప్రభుత్వం తరఫు న్యాయవాది పి. శ్రవణ్ కుమార్ గౌడ్ కోర్టుకు తెలిపారు.
ఇరుపక్షాల వాదనలు విన్న న్యాయమూర్తి, ఆహార భద్రతా ప్రమాణాలను పాటించడం తప్పనిసరి అని తేల్చి చెప్పారు. యాజమాన్యం లోపాలను సరిచేశామని చెబుతున్న నేపథ్యంలో, అధికారులు మరోసారి క్షేత్రస్థాయిలో తనిఖీ చేసి నివేదిక సమర్పించాలని ఆదేశించారు.
ఈ వ్యవహారంపై తదుపరి విచారణను హైకోర్టు శుక్రవారానికి వాయిదా వేసింది. అప్పటి వరకు సస్పెన్షన్ ఎత్తివేతకు సంబంధించిన మధ్యంతర ఉత్తర్వులు ఇచ్చేందుకు కోర్టు నిరాకరించింది.
