హామిల్టన్‌లోని సెడాన్ పార్క్‌లో భారత్‌తో జరిగిన ఐదో టీ20 మ్యాచ్‌తో మిచెల్ శాంట్నర్ తన 143వ అంతర్జాతీయ టీ20 మ్యాచ్‌ను పూర్తి చేశారు. ఈ ప్రదర్శనతో న్యూజిలాండ్ తరఫున అత్యధిక టీ20 మ్యాచ్‌లు ఆడిన పురుష ఆటగాడిగా ఆయన రికార్డు సృష్టించారు.
గతంలో ఈ రికార్డు ఇష్ సోధి పేరు మీద ఉండేది. సోధి 142 మ్యాచ్లతో ఈ జాబితాలో రెండో స్థానానికి పడిపోయారు. శాంట్నర్ 2015లో టీ20 అంతర్జాతీయ క్రికెట్లోకి అడుగుపెట్టారు. దశాబ్ద కాలానికి పైగా సాగిన తన కెరీర్‌లో ఆయన ఈ మైలురాయిని చేరుకున్నారు.
ఈ జాబితాలో మిగిలిన ఆటగాళ్ల విషయానికి వస్తే, మాజీ ఫాస్ట్ బౌలర్ టిమ్ సౌథీ 126 మ్యాచ్లతో మూడో స్థానంలో ఉన్నారు. మార్టిన్ గుప్టిల్ 122 మ్యాచ్లతో నాలుగో స్థానంలో ఉండగా, డారిల్ మిచెల్ 109 మ్యాచ్లతో ఐదో స్థానంలో కొనసాగుతున్నారు.
34 ఏళ్ల శాంట్నర్ తన కెరీర్‌లో బ్యాటింగ్, బౌలింగ్ రెండింటిలోనూ రాణించారు. ఇప్పటివరకు ఆడిన 143 మ్యాచ్‌లలో 20.30 సగటుతో 1,117 పరుగులు చేశారు. ఇందులో 77 నాటౌట్ ఆయన అత్యధిక స్కోరుగా ఉంది.
బౌలింగ్‌లో 23.09 సగటుతో 151 వికెట్లు తీశారు. ఇటీవల జరిగిన నాలుగో టీ20 మ్యాచ్‌లో అక్షర్ పటేల్, నితీశ్ కుమార్ రెడ్డిలను అవుట్ చేయడం ద్వారా, 150 టీ20 వికెట్లు తీసిన మూడో న్యూజిలాండ్ బౌలర్‌గా కూడా ఆయన నిలిచారు.
అయితే, హామిల్టన్‌లో జరిగిన రికార్డు మ్యాచ్‌లో శాంట్నర్‌కు వికెట్లు దక్కలేదు. భారత ఇన్నింగ్స్‌లో తన నాలుగు ఓవర్ల కోటాలో ఆయన 39 పరుగులు ఇచ్చారు.
