నోయిడాలోని PVR INOX థియేటర్కు సినిమా చూడటానికి వెళ్లిన జ్యోత్స్న రంగీన్ అనే మహిళకు చేదు అనుభవం ఎదురైంది. ఆమెకు టైప్-1 డయాబెటిస్ ఉండటంతో, అత్యవసర సమయంలో రక్తంలో చక్కెర స్థాయిలు పడిపోకుండా చూసుకునేందుకు అవసరమైన మెడికల్ కిట్ను ఆమె వెంట తీసుకెళ్లారు. అయితే, భద్రతా సిబ్బంది ఆ కిట్ను అనుమతించలేదు.
ఈ విషయంపై థియేటర్ మేనేజర్ ఆమెతో వాదనకు దిగారు. ఇలాంటి అనారోగ్య సమస్యలు ఉంటే సినిమాకు రాకూడదని, సినిమాకు వచ్చి ఇబ్బంది పెట్టడం ఏంటని మేనేజర్ వ్యాఖ్యానించినట్లు జ్యోత్స్న తన 'X' ఖాతాలో పేర్కొన్నారు. ఇది వివక్ష అని ఆమె ఆవేదన వ్యక్తం చేశారు. టైప్-1 డయాబెటిస్ ఉన్నవారికి ఆహారం, గ్లూకోజ్ వంటి అత్యవసర సామాగ్రి ఎప్పుడూ అందుబాటులో ఉండటం వైద్యపరంగా చాలా ముఖ్యమని ఆమె వివరించారు.
ఈ ఘటనపై సోషల్ మీడియాలో విమర్శలు రావడంతో PVR యాజమాన్యం స్పందించింది. జ్యోత్స్నకు క్షమాపణలు చెబుతూ, జరిగిన అసౌకర్యానికి చింతిస్తున్నామని పేర్కొంది. తమ సెక్యూరిటీ సిబ్బంది ఆ కిట్ను బయటి ఆహారంగా పొరబడ్డారని, ఆ తర్వాత అది మెడికల్ కిట్ అని గుర్తించి డ్యూటీ మేనేజర్కు సమాచారం అందించినట్లు కంపెనీ తెలిపింది.
భవిష్యత్తులో ఇలాంటి ఇబ్బందులు లేకుండా, వైద్యపరంగా అవసరమైన ఆహారం, పానీయాలు మరియు డయాబెటిస్ కిట్లను తమ సినిమా హాళ్లలోకి అనుమతిస్తామని PVR INOX స్పష్టం చేసింది. ఆ తర్వాత సదరు మహిళను థియేటర్ లోపలికి అనుమతించినట్లు కంపెనీ వెల్లడించింది.
