నందికొట్కూరు మండలం మల్యాల గ్రామానికి చెందిన వీఆర్వో మనోహర్, విధి నిర్వహణలో ఉండాల్సిన సమయంలో రాజకీయ కార్యక్రమంలో పాల్గొనడం స్థానికంగా చర్చనీయాంశమైంది. డీఎస్సీ (DSC) నియామకాల్లో అవకతవకలు జరిగాయని ఆరోపిస్తూ వైఎస్సార్సీపీ ఆధ్వర్యంలో సోమవారం నిర్వహించిన ర్యాలీలో ఆయన పాల్గొన్నారు.
ఈ ర్యాలీకి సంబంధించిన ఫొటోలు సామాజిక మాధ్యమాల్లో విస్తృతంగా వ్యాపించాయి. ప్రభుత్వ ఉద్యోగిగా ఉంటూ రాజకీయ కార్యక్రమాలకు హాజరు కావడం సర్వీస్ నిబంధనలకు విరుద్ధమని స్థానికులు అభ్యంతరం వ్యక్తం చేస్తున్నారు. ప్రజలకు సేవలు అందించాల్సిన బాధ్యత కలిగిన ఉద్యోగులు, ఇలాంటి కార్యక్రమాలకు దూరంగా ఉండాలని వారు డిమాండ్ చేస్తున్నారు.
ఈ వ్యవహారంపై ఆత్మకూరు ఆర్డీవో సి. వెంకట శివ స్పందించారు. ఘటనపై పూర్తిస్థాయిలో విచారణ చేపడతామని ఆయన తెలిపారు. నిబంధనలను ఉల్లంఘించిన వారిపై ఎవరినీ ఉపేక్షించకుండా కఠిన చర్యలు తీసుకుంటామని ఆర్డీవో స్పష్టం చేశారు.
