రాష్ట్రంలోని 9 మున్సిపల్ కార్పొరేషన్లలో ఇకపై ట్రాన్స్జెండర్లకు కో-ఆప్షన్ సభ్యులుగా అవకాశం దక్కనుంది. ఈ మేరకు ప్రభుత్వం ప్రవేశపెట్టిన తెలంగాణ పురపాలక చట్టం(సవరణ)–2019 బిల్లుకు అసెంబ్లీతో పాటు శాసనమండలిలో అన్ని పార్టీలు మద్దతు తెలపడంతో ఏకగ్రీవంగా ఆమోదం లభించింది. మంత్రి శ్రీధర్ బాబు ఈ బిల్లును సభలో ప్రవేశపెట్టారు.
ప్రస్తుతం మున్సిపల్ పాలనలో అనుభవం ఉన్న ముగ్గురు, మైనార్టీ వర్గానికి చెందిన ఇద్దరు కో-ఆప్షన్ సభ్యులుగా ఉంటున్నారు. వీరికి అదనంగా ఇప్పుడు ఒక ట్రాన్స్జెండర్ను కూడా ప్రతి కార్పొరేషన్లో నియమించనున్నట్లు మంత్రి శ్రీధర్ బాబు వెల్లడించారు. దీనివల్ల బడ్జెట్, పారిశుద్ధ్యం, ప్రజారోగ్యం మరియు సంక్షేమ పథకాల రూపకల్పనలో వారు తమ సమస్యలను నేరుగా అధికారుల దృష్టికి తీసుకెళ్లే అవకాశం కలుగుతుంది.
ఈ పదవికి ఎంపికయ్యే వారు సంబంధిత మున్సిపల్ కార్పొరేషన్ పరిధిలో ఓటరుగా నమోదై ఉండాలి. అలాగే, నోటిఫికేషన్ విడుదలయ్యే సమయానికి వారికి కనీసం 21 ఏళ్ల వయస్సు నిండి ఉండాలి. వీరు కౌన్సిల్ సమావేశాల్లో పాల్గొని మాట్లాడే హక్కును కలిగి ఉంటారు, కానీ ఓటు వేసే అధికారం మాత్రం ఉండదు.
ఈ నిర్ణయంపై పలువురు ఎమ్మెల్యేలు హర్షం వ్యక్తం చేశారు. ట్రాన్స్జెండర్ల కోసం ప్రత్యేక వెల్ఫేర్ బోర్డు ఏర్పాటు చేయాలని, గ్రామ పంచాయతీలు, మండల పరిషత్లలో కూడా వారికి అవకాశం కల్పించాలని కొందరు సభ్యులు కోరారు. అలాగే, నకిలీ ట్రాన్స్జెండర్ల బెడద లేకుండా డేటా వెరిఫికేషన్ చేయాలని, సమాజంలో వెనుకబడిన వర్గాల వారిని గుర్తించాలని సూచించారు.
హైదరాబాద్ నగరంలో ఇప్పటికే ట్రాన్స్జెండర్లను ట్రాఫిక్ విభాగంలో విధుల్లోకి తీసుకున్నామని మంత్రి గుర్తుచేశారు. వారికి గౌరవప్రదమైన జీవనోపాధి, వైద్య సౌకర్యాలు కల్పించడంతో పాటు ఇందిరమ్మ ఇండ్లు కూడా కేటాయిస్తామని ప్రభుత్వం ప్రకటించింది. ఈ చారిత్రక నిర్ణయంతో సమాజంలో చిన్నచూపు చూసే వర్గానికి చట్టసభల్లో గుర్తింపు దక్కుతుందని సభ్యులు అభిప్రాయపడ్డారు.
