ఎలాంటి అంచనాలు లేకుండా విడుదలై బాక్సాఫీస్ వద్ద 240 కోట్లకు పైగా వసూళ్లు సాధించిన చిత్రం 'మంజుమ్మల్ బాయ్స్'. గుణ కేవ్స్ నేపథ్యంలో జరిగిన నిజ జీవిత సంఘటనల ఆధారంగా తెరకెక్కిన ఈ సర్వైవల్ థ్రిల్లర్, మలయాళంతో పాటు ఇతర దక్షిణాది భాషల్లోనూ పెద్ద విజయాన్ని అందుకుంది.
ఈ సినిమా విజయం తర్వాత హిందీలో రీమేక్ చేసేందుకు పలు నిర్మాణ సంస్థలు ఆసక్తి చూపుతున్నాయి. ఒరిజినల్ వెర్షన్ను రూపొందించిన చిదంబరం దర్శకత్వంలోనే రీమేక్ చేయాలని వారు ప్రయత్నిస్తున్నారు. అయితే, ఈ ప్రతిపాదనలను ఆయన సున్నితంగా తిరస్కరించారు. ఇప్పటికే హిందీలో డబ్ చేసి విడుదల చేశామని, మళ్లీ రీమేక్ చేయడం వల్ల సినిమాకు ఉన్న అసలైన ఆత్మ (సోల్) దెబ్బతింటుందని ఆయన అభిప్రాయపడ్డారు.
సీక్వెల్ గురించి వస్తున్న వార్తలపై కూడా చిదంబరం స్పందించారు. ఆ కుర్రాళ్లు మళ్లీ ఏదైనా ప్రమాదంలో చిక్కుకుంటేనే సీక్వెల్ సాధ్యమవుతుందని, అంత క్రూరంగా ఎందుకు ఆలోచించాలని ఆయన ప్రశ్నించారు. నిజమైన సంఘటన ఆధారంగా రూపొందడమే ఈ సినిమాకు ప్రధాన ఆకర్షణ అని, ఫిక్షనల్ కథతో సీక్వెల్ చేస్తే ఈ స్థాయిలో ఆదరణ లభించదని ఆయన తేల్చి చెప్పారు.
దర్శకుడి తాజా వ్యాఖ్యలతో ఈ బ్లాక్బస్టర్ చిత్రానికి సీక్వెల్ వచ్చే అవకాశం లేదని స్పష్టమైంది. కథా పరంగా ఇది ఒక పూర్తి స్థాయి చిత్రమని, దీనిని కొనసాగించాల్సిన అవసరం లేదని ఆయన అభిప్రాయపడటంతో ఈ చర్చకు తెరపడింది.
