ఇటీవల అనసూయ చేసిన వ్యాఖ్యలు సోషల్ మీడియాలో పెద్ద ఎత్తున చర్చకు దారితీశాయి. సనాతన ధర్మాన్ని ఆమె అవమానించారని ఆరోపిస్తూ నెటిజన్లు విమర్శలు చేయడంతో, ఆమె తన ఇన్స్టాగ్రామ్ ఖాతాలో సుదీర్ఘ పోస్ట్ ద్వారా స్పందించారు.
తన మాటలను కొందరు కావాలనే తప్పుదోవ పట్టిస్తున్నారని అనసూయ పేర్కొన్నారు. తనను వ్యక్తిగతంగా వేధిస్తూ, అభ్యంతరకరమైన కామెంట్లు చేసే వారిని ఉద్దేశించి మాత్రమే తాను మాట్లాడానని, అది ఏ మతానికి లేదా వర్గానికి వ్యతిరేకం కాదని ఆమె స్పష్టం చేశారు.
తాను కూడా సనాతన ధర్మాన్ని పాటించే హిందువునేనని అనసూయ తెలిపారు. హనుమంతుడి ధైర్యం, నిజాయితీ తనకు స్ఫూర్తి అని, అన్యాయం జరిగినప్పుడు మౌనంగా ఉండలేకనే తాను ప్రశ్నించానని ఆమె వివరించారు.
ఎడిట్ చేసిన వీడియో క్లిప్లు, సగం సగం కథనాలను నమ్మవద్దని ఆమె కోరారు. మతం ఆధారంగా ఎవరినీ తక్కువ చేసి చూడనని, తనను వేధించే వారిని మాత్రమే తాను ప్రశ్నిస్తానని చెబుతూ ఆమె ఈ వివాదానికి ముగింపు పలికారు.
