నిర్మల్ జిల్లాలో స్పెషల్ ఇంటెన్సివ్ రివిజన్ (ఎస్ఐఆర్) ప్రక్రియ గందరగోళంగా మారింది. నకిలీ ఓట్ల తొలగింపు, అసలైన ఓటర్ల గుర్తింపు లక్ష్యంగా సాగాల్సిన ఈ ప్రక్రియలో భాగంగా బూత్ లెవల్ ఆఫీసర్లు (బీఎల్వోలు) ఇంటింటికీ వెళ్లి ఎన్యుమరేషన్ ఫారాలు అందజేయాల్సి ఉంది. కానీ నిర్మల్, భైంసా, ఖానాపూర్ పట్టణాల్లో చాలా చోట్ల బీఎల్వోలు ఇళ్లకు రాలేదు. దీంతో రోజూవారి పనులకు వెళ్లేవారు, వృద్ధులు, మహిళలు ఫారాల కోసం కాలనీల వెంబడి గాలించాల్సిన పరిస్థితి నెలకొంది.
అధికారులు మాత్రం 100 శాతం ఫారాలు పంపిణీ చేశామని చెబుతున్నారు. కానీ క్షేత్రస్థాయిలో పరిస్థితి పూర్తిగా భిన్నంగా ఉంది. బీఎల్వోలు కాలనీల్లో ఏదో ఒక అనుకూలమైన చోట కూర్చుని, సమాచారం తెలిసి వచ్చిన వారికే ఫారాలు ఇస్తున్నారు. ఫారాలు దొరికిన వారు కూడా 2002 నాటి పోలింగ్ బూత్ నంబర్, సీరియల్ నంబర్ వివరాలు ఆన్లైన్లో లభ్యం కాకపోవడంతో ఫారాలు నింపలేక తీవ్ర ఇబ్బందులు పడుతున్నారు. నిర్మల్లోని భాగ్యనగర్ కాలనీవాసి ఒకరు రెండు గంటల పాటు నిరీక్షించినా నలుగురు కుటుంబ సభ్యుల్లో ముగ్గురి ఫారాలు మాత్రమే అందాయి.
మరోవైపు ఎన్యుమరేషన్ ఫారంలో ఆధార్ నంబర్ రాయడం ఐచ్ఛికం (ఆప్షనల్) కావడంతో కొందరు అక్రమార్కులు దీనిని ఆసరాగా చేసుకుంటున్నారు. రెండు లేదా అంతకంటే ఎక్కువ ప్రాంతాల్లో ఓట్లు ఉన్నవారు.. వేర్వేరు కుటుంబ సభ్యుల వివరాలతో (తండ్రి, తాత, నానమ్మ) ఫారాలు నింపి డబుల్ ఓట్లను పదిలంగా ఉంచుకునేందుకు ప్రయత్నిస్తున్నారు. నిర్మల్ పట్టణంలోని 12వ, 28వ వార్డుల్లో ఒకే వ్యక్తి ఈ విధంగా మోసం చేస్తున్నట్లు తెలిసింది. ఆధార్ లింక్ లేకపోవడంతో సాఫ్ట్వేర్లో డూప్లికేట్ ఓట్లు పసిగట్టబడటం లేదు.
రాష్ట్ర ఎన్నికల సంఘం రెండు చోట్ల ఓటు హక్కు ఉండి వివరాలు దాచిపెడితే ఏడాది జైలు శిక్ష విధిస్తామని హెచ్చరికలు జారీ చేసింది. అయినా అక్రమార్కుల్లో చలనం కనిపించడం లేదు. జిల్లా అధికారులు బీఎల్వోలు ప్రతి ఇంటికీ వెళ్లేలా నిఘా పెట్టాలని, ఒకే పేరుతో ఉన్న ఓటర్ల దరఖాస్తులను క్షుణ్ణంగా రీ-వేరిఫికేషన్ చేయాలని కోరుతున్నారు. లేదంటే కేంద్ర ఎన్నికల సంఘం ఆశించిన పారదర్శకత కాగితాలకే పరిమితమయ్యే ప్రమాదం ఉంది.
