దేశంలోనే అతిపెద్ద టైగర్ రిజర్వ్లలో ఒకటైన నల్లమల అడవుల్లో వరుసగా పులులు మరణిస్తుండటం పర్యావరణవేత్తలను ఆందోళనకు గురిచేస్తోంది. అక్రమ వేటగాళ్ల ఉచ్చు, విష ప్రయోగాలు, విద్యుత్ తీగలు లేదా సహజ కారణాల వల్ల ఈ మరణాలు సంభవిస్తున్నాయా అనే కోణంలో అధికారులు దర్యాప్తు చేస్తున్నారు. అడవుల విస్తీర్ణం తగ్గడం, అటవీ అంచుల్లో మానవ కార్యకలాపాలు పెరగడం వల్ల పులులు ఆహారం, నీటి కోసం జనావాసాలకు వచ్చి ప్రమాదాలకు గురవుతున్నాయని నిపుణులు పేర్కొంటున్నారు.
ఈ వరుస ఘటనలను తీవ్రంగా పరిగణించిన రాష్ట్ర ప్రభుత్వం, జీవో ఆర్టీఈ నెంబర్ 91 ద్వారా ఐదుగురు సభ్యులతో కూడిన ఉన్నత స్థాయి కమిటీని నియమించింది. రిటైర్డ్ ఐఎఫ్ఎస్ అధికారి పి. మల్లిఖార్జున రావు ఈ కమిటీకి నేతృత్వం వహిస్తారు. సంఘటన స్థలాలను క్షుణ్ణంగా పరిశీలించి, 72 గంటల్లోపు ప్రాథమిక నివేదికను సమర్పించాలని ప్రభుత్వం ఆదేశించింది.
పులుల మరణాలకు గల అసలు కారణాలను గుర్తించడంతో పాటు, భవిష్యత్తులో ఇలాంటి ఘటనలు జరగకుండా సమగ్ర కార్యాచరణను రూపొందించాలని కమిటీకి బాధ్యతలు అప్పగించారు. వేట నిరోధక చర్యలను బలోపేతం చేయడం, అడవుల్లో పెట్రోలింగ్ను పెంచడం, హనుమాన్ ప్రాజెక్ట్ ద్వారా మానవ-వన్యప్రాణి సంఘర్షణను తగ్గించడం వంటి అంశాలపై కమిటీ దృష్టి సారించనుంది.
వైల్డ్లైఫ్ కారిడార్లను శాస్త్రీయంగా సంరక్షించడం మరియు స్థానిక ప్రజలకు కమ్యూనిటీ ఈకో-టూరిజం ద్వారా ఉపాధి అవకాశాలు కల్పించడం వంటి అంశాలపై రెండు నెలల్లో సమగ్ర నివేదిక ఇవ్వాలని ప్రభుత్వం సూచించింది. మరణాలకు గల కారణాలను విశ్లేషించి, నివారణ చర్యలను చేపట్టడమే ఈ కమిటీ ప్రధాన లక్ష్యం.
