కుమ్రం భీం ఆసిఫాబాద్ జిల్లాలో 60 మత్స్య సహకార సంఘాల పరిధిలో సుమారు 2,750 మంది సభ్యులు ఉన్నారు. వీరితో పాటు కుమ్రం భీం ప్రాజెక్టులో చేపలు పట్టేందుకు లైసెన్స్ కలిగిన మరో 350 మంది మత్స్యకారులు ఉన్నారు. జిల్లాలో ప్రత్యక్షంగా, పరోక్షంగా దాదాపు 5 వేల కుటుంబాలు చేపల వేటపైనే జీవనాధారం పొందుతున్నాయి.
గత బీఆర్ఎస్ ప్రభుత్వ హయాంలో ఎనిమిదేళ్ల పాటు జలాశయాల్లో ఉచితంగా చేప పిల్లలను పంపిణీ చేశారు. రెండేళ్ల క్రితం వరకు జిల్లాలోని 243 చెరువులు, 11 పెద్ద చెరువులు, నాలుగు రిజర్వాయర్లలో 1.38 కోట్ల చేప పిల్లలను వదిలారు. దీనివల్ల ప్రతి మత్స్యకార కుటుంబానికి రూ. 25 వేల నుంచి రూ. 30 వేల వరకు ఆదాయం సమకూరింది. అయితే, కాంగ్రెస్ ప్రభుత్వం అధికారంలోకి వచ్చిన తర్వాత ఈ ప్రక్రియలో జాప్యం జరుగుతుండటంతో మత్స్యకారులు అయోమయంలో ఉన్నారు.
గతేడాది సెప్టెంబర్, అక్టోబర్ నెలల్లో చేప పిల్లలను పంపిణీ చేయడం వల్ల అవి సరిగ్గా ఎదగలేదని మత్స్యకారులు చెబుతున్నారు. జూలై, ఆగస్టు నెలల్లో వేయాల్సిన చేప పిల్లలను వర్షాకాలం ముగిసే సమయానికి వదలడం వల్ల చేపల బరువు పెరగక నష్టపోయామని వారు పేర్కొన్నారు. ఈ ఏడాది కూడా ప్రభుత్వం చేప పిల్లలను పంపిణీ చేస్తుందో లేదో తెలియక వారు ఆందోళన చెందుతున్నారు.
ప్రస్తుతం చేప పిల్లల పంపిణీపై ప్రభుత్వం నుండి ఎటువంటి స్పష్టత లేకపోవడంతో మత్స్యకారులు ఆందోళనలో ఉన్నారు. కనీసం ఈ ఏడాదైనా తమకు ఆర్థిక ప్రయోజనం చేకూరేలా ప్రభుత్వం తక్షణమే చర్యలు తీసుకోవాలని వారు డిమాండ్ చేస్తున్నారు.
