శ్రీలంకతో జరిగిన కొలంబో టెస్టులో యశస్వీ జైస్వాల్ను ఔట్ చేసిన తర్వాత లంక పేసర్ అసితా ఫెర్నాండో నోరు పారేసుకోవడంతోనే గొడవ మొదలైందని ధ్రువ్ జురెల్ తెలిపాడు. మాజీ క్రికెటర్ ఆకాశ్ చోప్రాతో జరిగిన పాడ్కాస్ట్ ఇంటర్వ్యూలో జురెల్ ఈ విషయాన్ని వెల్లడించాడు. ఆ సమయంలో యశస్వీతో కలిసి క్రీజులో నాన్ స్ట్రయికర్గా ఉన్న జురెల్, అసలు ఏం జరిగిందో వివరించాడు.
యశస్వీ ఔటైన తర్వాత ఎటువంటి గొడవ చేయకుండా నిశ్శబ్దంగా పెవిలియన్ వైపు వెళ్తున్నాడని జురెల్ చెప్పాడు. అయితే, అసితా ఫెర్నాండో అతడిని ఉద్దేశించి అసభ్యకరమైన పదజాలంతో దూషించాడని యశస్వీ తనతో చెప్పాడని జురెల్ పేర్కొన్నాడు. దీంతో యశస్వీ వెనక్కి తిరిగి, వికెట్ తీసినందుకు సంబరాలు చేసుకోవాలి కానీ అనవసరంగా నోరు జారవద్దని ఫెర్నాండోను హెచ్చరించాడు.
యశస్వీ వ్యాఖ్యలతో లంక బౌలర్ మరింత రెచ్చిపోవడంతో ఇద్దరి మధ్య మాటల యుద్ధం పెరిగింది. ఒకరికొకరు ఎదురెదురుగా చాలా దగ్గరగా రావడంతో పరిస్థితి ఉద్రిక్తంగా మారింది. చివరికి లంక కెప్టెన్ ధనుంజయ డిసిల్వా జోక్యం చేసుకుని ఇద్దరినీ వేరు చేయడంతో గొడవ సద్దుమణిగింది.
ఈ ఘటనపై మరుసటి రోజు కామెంటేటర్ హర్ష భోగ్లే సోషల్ మీడియాలో పోలింగ్ నిర్వహించి యశస్వీ హద్దు మీరాడని వ్యాఖ్యానించాడు. దీనిపై స్పందించిన యశస్వీ, మైదానంలో అసలు ఏం జరిగిందో తెలుసుకోకుండా తనను నిందించడం సరికాదని అన్నాడు. ఎవరైనా అకారణంగా తమను రెచ్చగొడితే భారత జట్టు చూస్తూ ఊరుకోదని, తగిన సమాధానం ఇస్తుందని యశస్వీ స్పష్టం చేశాడు.
