కట్టంగూర్ మండల వ్యవసాయ అధికారి గిరిప్రసాద్ సోమవారం రైతు వేదికలో విత్తన మేళా కార్యక్రమాన్ని ప్రారంభించారు. ఈ సందర్భంగా ఆయన మాట్లాడుతూ, రైతులు సాంప్రదాయ వరి పంటకు బదులుగా ప్రత్యామ్నాయ పంటల వైపు మొగ్గు చూపాలని కోరారు.
ప్రస్తుత వర్షాభావ పరిస్థితులను దృష్టిలో ఉంచుకుని, తక్కువ నీటి వినియోగంతో అధిక దిగుబడులు ఇచ్చే పంటలను ఎంచుకోవాలని ఆయన సూచించారు. ముఖ్యంగా కంది, పెసర, మినుము, వేరుశనగ, పొద్దుతిరుగుడు, ఆముదం మరియు నువ్వుల వంటి పంటలను సాగు చేయడం వల్ల రైతులకు ఎక్కువ లాభం చేకూరుతుందని ఆయన వివరించారు.
ఈ విత్తన మేళా కార్యక్రమం ఈ నెల 29 వరకు కొనసాగుతుందని అధికారులు తెలిపారు. రైతులు ఈ అవకాశాన్ని సద్వినియోగం చేసుకోవాలని వారు కోరారు. ఈ కార్యక్రమంలో ఏఈఓలు కల్లెపల్లి పరుశరాములు, నవీన్ మరియు స్థానిక రైతులు పాల్గొన్నారు.
