బాలి పర్యటనలో ఉన్నప్పుడు మాట్ ఫ్లాక్ కాంటాక్ట్ లెన్స్లు తీసేయకుండానే స్విమ్మింగ్ పూల్లోకి దిగారు. ఆ తర్వాత కొద్దిసేపటికే ఆయన ఎడమ కన్ను తెరవడం కష్టంగా మారింది. మొదట సముద్రపు నీరు లేదా ఇసుక వల్ల కంట్లో ఏదో పడిందని భావించినప్పటికీ, క్రమంగా పరిస్థితి విషమించింది.
తీవ్రమైన కంటి నొప్పి, కాంతిని చూడలేకపోవడం, కన్ను ఎర్రబడటం వంటి లక్షణాలు మొదలవ్వడంతో ఆయన ఇబ్బంది పడ్డారు. కంటి నుంచి నీరు నిరంతరం కారుతుండటంతో, స్థానిక ఫార్మసీలో దొరికే చుక్కల మందు వాడినా ఫలితం లేకపోయింది. రెండు నెలల తర్వాత యూకేలో డాక్టర్ను సంప్రదించగా, కార్నియా స్క్రేపింగ్ — అంటే కంటి పైపొర నుంచి కణజాలాన్ని సేకరించి చేసే పరీక్ష — ద్వారా ఇన్ఫెక్షన్ను గుర్తించారు.
వైద్యులు దీనిని అకాంతమీబా కెరటిటైస్ అని నిర్ధారించారు. ఈత కొలనులు, సరస్సులు, హాట్ టబ్స్లో ఉండే ఈ సూక్ష్మజీవి కాంటాక్ట్ లెన్స్ కింద ఇరుక్కుపోయి, కంటి బయటి పొరలోకి చొచ్చుకుపోతుంది. ఇది కంటి కణజాలాన్ని తినేస్తూ తీవ్రమైన మంటను కలిగిస్తుందని క్లీవ్ల్యాండ్ క్లినిక్ వైద్యులు వివరించారు.
ఈ ఇన్ఫెక్షన్ వల్ల కంటి చూపు కోల్పోయే ప్రమాదం ఉందని, ఒకవేళ మందులతో తగ్గకపోతే కార్నియా మార్పిడి ఆపరేషన్ చేయాల్సి ఉంటుందని వైద్యులు హెచ్చరించారు. రోగనిరోధక శక్తి తక్కువగా ఉన్నవారికి లేదా కాంటాక్ట్ లెన్స్లు వాడే వారికి ఈ ముప్పు ఎక్కువగా ఉంటుందని వారు పేర్కొన్నారు.
తాను పడ్డ ఇబ్బంది మరెవరికీ రాకూడదని మాట్ ఫ్లాక్ కోరుకుంటున్నారు. స్విమ్మింగ్ పూల్లోకి దిగే ముందు కాంటాక్ట్ లెన్స్లను కచ్చితంగా తీసేయాలని ఆయన సూచించారు.
