కాజీపేట కోచ్ ఫ్యాక్టరీలో కోచ్ల ఉత్పత్తిని ప్రైవేటు సంస్థలకు అప్పగించాలని గతంలో తీసుకున్న నిర్ణయంపై రైల్వే బోర్డు పునరాలోచనలో పడింది. ఈ ప్రాజెక్టు కోసం ఇప్పటికే టెండర్లు పిలిచినప్పటికీ, ప్రైవేటు భాగస్వామ్యం కంటే రైల్వే శాఖే నేరుగా ఈ కర్మాగారాన్ని నిర్వహించడం మేలని అధికారులు భావిస్తున్నారు. ఇటీవల రైల్వే బోర్డు చైర్మన్ స్వయంగా ఫ్యాక్టరీని పరిశీలించి, ఢిల్లీలో జరిగిన ఉన్నతస్థాయి సమావేశంలో దీనిపై అభిప్రాయాలను సేకరించారు.
ఈ ఫ్యాక్టరీని ప్రైవేటుకు అప్పగించడాన్ని స్థానిక ప్రజాసంఘాలు, కార్మిక సంఘాలు, నిరుద్యోగ యువత తీవ్రంగా వ్యతిరేకిస్తున్నాయి. ప్రభుత్వ నిధులతో భూసేకరణ చేసి, కోట్లాది రూపాయల వ్యయంతో మౌలిక వసతులు కల్పించిన తర్వాత ప్రైవేటుకు ఇవ్వడం సమంజసం కాదని విమర్శలు వస్తున్నాయి. ప్రైవేటు సంస్థలకు అప్పగిస్తే రైల్వే ఉద్యోగాలు దొరకవని, కాంట్రాక్టు పద్ధతిలోనే పనులు జరుగుతాయని ఆందోళన వ్యక్తమవుతోంది. చెన్నైలోని ఇంటిగ్రల్ కోచ్ ఫ్యాక్టరీ, కపుర్తలాలోని రైల్ కోచ్ ఫ్యాక్టరీల తరహాలో దీన్ని ప్రభుత్వమే నిర్వహిస్తే స్థానికులకు ఉపాధి అవకాశాలు మెరుగుపడతాయని భావిస్తున్నారు.
ఆర్థిక కోణంలో చూసినా సొంత నిర్వహణే లాభదాయకమని అంచనా వేస్తున్నారు. ప్రైవేటు భాగస్వామ్యం వల్ల ప్రారంభంలో పెట్టుబడి భారం తగ్గినట్లు అనిపించినా, దీర్ఘకాలంలో ఉత్పత్తి వ్యయం, లీజు, రాయల్టీ వంటి అంశాల వల్ల ప్రభుత్వంపై అదనపు భారం పడే అవకాశం ఉంది. అంతేకాకుండా, వందే భారత్, అమృత్ భారత్, వందే మెట్రో కోచ్ల డిమాండ్ దేశవ్యాప్తంగా పెరుగుతున్న నేపథ్యంలో, ఈ ఫ్యాక్టరీని పూర్తిస్థాయి ప్రభుత్వ ఉత్పత్తి కేంద్రంగా మార్చడం వల్ల రైల్వే శాఖకే అధిక ప్రయోజనం కలుగుతుందని అధికారులు భావిస్తున్నారు.
ప్రస్తుతం మహారాష్ట్రలోని లాతూర్లో ఉన్న మరాఠ్వాడా రైల్ కోచ్ ఫ్యాక్టరీని రైల్ వికాస్ నిగమ్ లిమిటెడ్ సొంతంగా నిర్వహిస్తోంది. అదే తరహాలో కాజీపేట ఫ్యాక్టరీని కూడా నిర్వహించేందుకు ఆ సంస్థ ఆసక్తి చూపుతోంది. రైల్వే శాఖ తుది నిర్ణయం తీసుకుంటే, కాజీపేట కోచ్ ఫ్యాక్టరీ ప్రభుత్వ రంగంలోనే కొనసాగే అవకాశం ఉంది.
