ఆంధ్రప్రదేశ్లో కోవిడ్ కేసులు మళ్లీ వెలుగుచూశాయి. జూన్ 26 నుంచి జూలై 15 వరకు రాష్ట్రవ్యాప్తంగా 67 మందికి పరీక్షలు నిర్వహించగా, 12 మందికి పాజిటివ్గా నిర్ధారణ అయింది. కడప, గుంటూరు, కాకినాడ జిల్లాల్లో ఈ కేసులు నమోదైనట్లు అధికారులు తెలిపారు.
వైరస్ సోకిన వారిలో నలుగురు మరణించారు. అయితే, వీరందరికీ గతంలోనే తీవ్ర అనారోగ్య సమస్యలు ఉన్నాయని వైద్య ఆరోగ్య శాఖ స్పష్టం చేసింది. ప్రస్తుతం ముగ్గురు హోం ఐసోలేషన్లో ఉండగా, ఇద్దరు ఆసుపత్రుల్లో చికిత్స పొందుతున్నారు. మరో ముగ్గురు కోలుకుని డిశ్చార్జ్ అయ్యారు. ఒకే ప్రాంతంలో కేసులు క్లస్టర్గా నమోదు కాలేదని అధికారులు పేర్కొన్నారు.
ప్రస్తుత పరిస్థితిపై వైరస్ జన్యుక్రమ విశ్లేషణ కోసం ఐదు నమూనాలను పుణెలోని జాతీయ వైరాలజీ సంస్థకు ప్రభుత్వం పంపింది. వైద్యులు, ఆసుపత్రులను అప్రమత్తం చేసినట్లు ఆరోగ్య శాఖ కార్యదర్శి వీర పాండియన్ తెలిపారు. దేశవ్యాప్తంగా జూలై 1 నుంచి 339 కేసులు నమోదు కాగా, అత్యధికంగా కేరళలో 115 కేసులు నమోదయ్యాయి.
ప్రజలు ఆందోళన చెందాల్సిన అవసరం లేదని, అప్రమత్తంగా ఉంటూ జాగ్రత్తలు పాటించాలని ఆరోగ్య శాఖ సూచించింది. కోవిడ్ మళ్లీ రావడంపై ప్రజల్లో ఆందోళన వ్యక్తమవుతున్నప్పటికీ, భయపడాల్సిన పనిలేదని నిపుణులు, అధికారులు చెబుతున్నారు.
