ద్విచక్ర వాహనాల ధరలు పెరుగుతున్న తరుణంలో హీరో మోటోకార్ప్ వినియోగదారులకు ఊరటనిచ్చే నిర్ణయం తీసుకుంది. తన ప్రజాదరణ పొందిన ‘HF డీలక్స్ క్యాన్వాస్ బ్లాక్’ బైక్ ధరను ఏకంగా రూ. 7,635 తగ్గించింది. దీంతో గతంలో రూ. 67,634 వరకు చేరిన ఈ బైక్ ధర, ఇప్పుడు రూ. 59,999కి పడిపోయింది. ఈ ధర బైక్ విడుదలైనప్పటి ప్రారంభ ధర కంటే కూడా తక్కువ కావడం గమనార్హం.
అయితే ఈ ధర తగ్గింపు ప్రయోజనం దేశవ్యాప్తంగా లేదు. కేవలం ఉత్తరప్రదేశ్, మధ్యప్రదేశ్, రాజస్థాన్, ఛత్తీస్గఢ్ రాష్ట్రాల్లోని కొనుగోలుదారులకు మాత్రమే ఈ ప్రత్యేక ఆఫర్ వర్తిస్తుంది. ఇతర రాష్ట్రాలకు ఈ ఆఫర్ను విస్తరించే అంశంపై హీరో మోటోకార్ప్ ఇప్పటివరకు ఎలాంటి అధికారిక ప్రకటన చేయలేదు.
ధర తగ్గించినప్పటికీ బైక్ పనితీరులో ఎలాంటి మార్పులు చేయలేదు. ఇందులో యథావిధిగా 97.2 సీసీ ఎయిర్-కూల్డ్ ఇంజిన్ ఉంది, ఇది 7.8 PS పవర్ మరియు 8.05 Nm టార్క్ను అందిస్తుంది. 4-స్పీడ్ గేర్బాక్స్, టెలిస్కోపిక్ ఫ్రంట్ ఫోర్క్స్, డ్యూయల్ రియర్ షాక్ అబ్జార్బర్లు మరియు డ్రమ్ బ్రేక్ ఫీచర్లు అలాగే కొనసాగుతున్నాయి.
ఈ నిర్ణయానికి గల కచ్చితమైన కారణాన్ని కంపెనీ వెల్లడించలేదు. అయినప్పటికీ, హోండా షైన్ 100, బజాజ్ ప్లాటినా 100, టీవీఎస్ స్పోర్ట్ వంటి బైకుల నుంచి వస్తున్న పోటీని తట్టుకుని, అమ్మకాలను పెంచుకోవడమే ఈ వ్యూహం వెనుక ఉన్న ప్రధాన ఉద్దేశమని మార్కెట్ నిపుణులు భావిస్తున్నారు.
