హార్మూజ్ జలసంధిని త్వరలోనే అమెరికా భూభాగంగా మారుస్తానని అమెరికా అధ్యక్షుడు డోనాల్డ్ ట్రంప్ గత వారం ప్రకటించారు. అయితే, మంగళవారం ఆయన ఆ ప్రాంతాన్ని అమెరికా కొత్త భూభాగంగా పేర్కొంటూ ఒక మ్యాప్ను విడుదల చేశారు. ఈ చర్యతో ఇరాన్ దౌత్యవేత్తలు ప్రతిదాడికి దిగి, కాలిఫోర్నియాను ఇరాన్ భూభాగంగా చూపిస్తూ ఒక చిత్రపటాన్ని విడుదల చేశారు.
ఇతర దేశాల భూభాగాలను తమవిగా పేర్కొనడం ట్రంప్కు కొత్తేమీ కాదు. రెండోసారి అధికారంలోకి వచ్చిన వెంటనే ఆయన గ్రీన్లాండ్పై కన్ను వేశారు. కెనడాను 51వ రాష్ట్రంగా మారుస్తామని, పనామా కాల్వ, గాజా ప్రాంతాలను సొంతం చేసుకుంటామని ఆయన పలుమార్లు చెప్పారు. వెనిజులా మ్యాప్లో అమెరికా జెండా రంగులను నింపడంతో పాటు, గల్ఫ్ ఆఫ్ మెక్సికోను గల్ఫ్ ఆఫ్ అమెరికాగా పిలవాలని ఉత్తర్వులు జారీ చేశారు.
ఈ పేరు మార్పు వల్ల మెక్సికో, క్యూబాల ప్రాదేశిక జల పరిధుల్లో ఎలాంటి మార్పులు లేకపోవడంతో ఆ దేశాలు మౌనంగా ఉన్నాయి. 2017లో పర్షియన్ గల్ఫ్ పేరును గల్ఫ్ ఆఫ్ అరేబియాగా మారుస్తామని ట్రంప్ ప్రకటించినప్పుడు, అప్పటి ఇరాన్ అధ్యక్షుడు హసన్ రౌహానీ ఆయనకు భౌగోళిక శాస్త్రం చదువుకోమని సలహా ఇచ్చారు. గత ఏడాది మే నెలలో సౌదీ అరేబియా, ఖతార్, యూఏఈ పర్యటనకు ముందు కూడా ఇలాంటి ప్రకటనలే చేశారు.
రియల్ ఎస్టేట్ వ్యాపార నేపథ్యం ఉన్న ట్రంప్, ఖనిజ సంపద ఉన్న ప్రాంతాలను అమెరికాలో విలీనం చేసుకోవాలనే భూదాహంతో ఉన్నారని విశ్లేషకులు భావిస్తున్నారు. ఉపాధ్యక్షుడు జేడీ వాన్స్ భార్య ఉషా వాన్స్ గ్రీన్లాండ్ పర్యటనకు వెళ్ళినప్పుడు డెన్మార్క్, గ్రీన్లాండ్ దేశాల నుండి నిరసనలు రావడంతో ఆమె పర్యటనను మధ్యలోనే విరమించుకోవాల్సి వచ్చింది. ఇలాంటి వివాదాస్పద వ్యాఖ్యలు, చిత్రపటాల ద్వారా ప్రజల భావోద్వేగాలను రెచ్చగొట్టి తన వైఫల్యాలను కప్పిపుచ్చుకోవాలని ట్రంప్ ప్రయత్నిస్తున్నారని విమర్శలు ఉన్నాయి.
ప్రస్తుతం అరేబియా సముద్రంలో ఉన్న అమెరికా విమానవాహక నౌక యూఎస్ఎస్ అబ్రహాం లింకన్లో సిబ్బంది దుర్భర పరిస్థితులను ఎదుర్కొంటున్నారని వార్తలు వస్తున్నాయి. అందులో పనిచేసే వారిని వెనక్కి పిలిపించాలని కుటుంబ సభ్యులు ఒత్తిడి చేస్తున్నారు. ఈ నేపథ్యంలో, ఇలాంటి చిత్రపట వివాదాలను పక్కన పెట్టి ఇరాన్తో సంధికి ప్రయత్నించడం అమెరికాకు, ట్రంప్ రాజకీయ భవిష్యత్తుకు మంచిదని భావిస్తున్నారు.
