మిస్టర్ పర్ఫెక్ట్ సినిమాలోని 'చలి చలిగా' పాటలోని రెండో చరణం రాయడానికి దేవి శ్రీ ప్రసాద్ సోదరుడు సాగర్ చూపించిన ఒక కొటేషన్ కారణమైందని ప్రముఖ గేయ రచయిత అనంత శ్రీరామ్ తెలిపారు. దేవి శ్రీ ప్రసాద్తో కలిసి ఆలోచిస్తున్న సమయంలో అనుకోకుండా దొరికిన ఈ వాక్యం పాటకు కొత్త దిశనిచ్చిందని ఆయన వివరించారు.
"I can show my anger towards you in front of anybody but I cant show my love even though there is nobody around you" అనే ఆ ఇంగ్లీష్ వాక్యాన్ని "నీపై కోపాన్ని ఎందరి ముందైనా బెదురేం లేకుండా తెలిపె నేను నీపై ఇష్టాన్ని నేరుగా నీకైనా తెలపాలనుకుంటే తడబడుతున్నాను" అనే చరణంగా మార్చినట్లు అనంత శ్రీరామ్ చెప్పారు. అనుకోని సమయాల్లో స్ఫూర్తికి తలుపులు తెరిచి ఉంచడం వల్లే ఇలాంటి అద్భుతాలు సాధ్యమవుతాయని ఆయన అన్నారు.
సినిమా రంగంలో విమర్శలు, క్షమాపణల అంశంపై కూడా అనంత శ్రీరామ్ తనదైన శైలిలో స్పందించారు. ఒక దర్శకుడిని క్షమాపణ చెప్పమని బలవంతం చేయడం మానసిక రోగం లాంటిదని, అలా చేయించుకుని ఆనందించడం పైశాచికానందమని ఆయన అభిప్రాయపడ్డారు. సినిమా నచ్చకపోతే చూడకుండా ఉండవచ్చు లేదా ఇతరులకు వద్దని చెప్పవచ్చు కానీ, దర్శకుడి నుంచి క్షమాపణ కోరడం తనకు అర్థం కాదని ఆయన అన్నారు.
తన అవకాశాలు, సంపాదనపై కొందరు చేసే వ్యాఖ్యలను కూడా ఆయన ఖండించారు. తమది వ్యవసాయ కుటుంబమని, ఆకలేస్తే పండించుకునే స్తోమత ఉందని, కడుపు నింపుకోవడానికి ఇండస్ట్రీ అవసరం లేదని అనంత శ్రీరామ్ స్పష్టం చేశారు. ఇంజినీరింగ్ మానేసి సినిమా రంగంలోకి రావడం, ఇండస్ట్రీ అలవాట్లకు దూరంగా ఉండటం వంటి నిర్ణయాలు తీసుకున్న తాను, టీనేజ్ నుంచే ఇలాంటి బెదిరింపులను ఎదుర్కొంటున్నానని ఆయన గుర్తుచేశారు.
