అమరావతిలో అటవీ శాఖ ఉన్నతాధికారులతో నిర్వహించిన సమీక్షా సమావేశంలో ఉప ముఖ్యమంత్రి, అటవీ శాఖ మంత్రి పవన్ కళ్యాణ్ కీలక నిర్ణయాలు ప్రకటించారు. రాష్ట్ర అటవీ సంపద అయిన ఎర్రచందనం అక్రమ రవాణాను అరికట్టేందుకు కూటమి ప్రభుత్వం జీరో టాలరెన్స్ విధానాన్ని అనుసరిస్తోందని ఆయన స్పష్టం చేశారు. ఈ మాఫియాను పూర్తిగా నిర్మూలించే క్రమంలో ఏమాత్రం ఉపేక్షించేది లేదని అధికారులను హెచ్చరించారు.
కేవలం కూలీలను పట్టుకోవడమే కాకుండా, స్మగ్లింగ్ ముఠాల వెనుక ఉన్న కింగ్పిన్లు, ఫైనాన్షియర్లపై ఉక్కుపాదం మోపాలని పవన్ కళ్యాణ్ ఆదేశించారు. అడవుల రక్షణ కోసం డ్రోన్ పరిజ్ఞానం వంటి అత్యాధునిక సాంకేతికతను వినియోగించి నిఘాను పటిష్టం చేయాలని ఆయన సూచించారు. దేశంలో ఎక్కడ ఎర్రచందనం నిల్వలు ఉన్నా, వాటిని గుర్తించి స్వాధీనం చేసుకోవాలని అధికారులకు దిశానిర్దేశం చేశారు.
అంతర్రాష్ట్ర సమన్వయాన్ని బలోపేతం చేయడం ద్వారా స్మగ్లింగ్ను అరికట్టవచ్చని ఆయన అభిప్రాయపడ్డారు. ఇతర రాష్ట్రాల పోలీసు, అటవీ శాఖ అధికారులతో కలిసి పనిచేస్తూ, అక్కడ దాచిన అక్రమ నిల్వలను స్వాధీనం చేసుకోవాలని కోరారు. ఎర్రచందనం సంపదను కాపాడుకోవడంలో అన్ని శాఖలు సమష్టిగా, బాధ్యతాయుతంగా ముందుకు సాగాలని ఆయన స్పష్టం చేశారు.
