డీఎస్సీ అక్రమాలపై వైఎస్సార్సీపీ గత 74 రోజులుగా చేపట్టిన నిరసన ర్యాలీలు విజయవంతం అయ్యాయని మాజీ సీఎం వైఎస్ జగన్మోహన్రెడ్డి తెలిపారు. ఈ మేరకు ఆయన తాడేపల్లి నుంచి ట్వీట్ చేస్తూ, పార్టీ నాయకులు, కార్యకర్తలు విద్యార్థులు, యువత, నిరుద్యోగుల మద్దతుతో ఈ పోరాటాన్ని నడిపారని ప్రశంసించారు.
చంద్రబాబు ప్రభుత్వం అధికార దుర్వినియోగం చేస్తూ, పోలీసు బలగాలతో ఉద్యమాన్ని అణచివేయాలని చూసిందని జగన్ ఆరోపించారు. నిర్బంధాలు, బెదిరింపులు, నోటీసులను లెక్కచేయకుండా ప్రజలు, పార్టీ శ్రేణులు కలిసి లక్షలాదిగా బయటకు వచ్చి శాంతియుతంగా నిరసనలు తెలిపారని ఆయన పేర్కొన్నారు. రాజ్యాంగం కల్పించిన హక్కులను ప్రభుత్వం ఉల్లంఘిస్తోందని ఆయన విమర్శించారు.
గత రెండు నెలలుగా రాష్ట్రవ్యాప్తంగా నిర్వహించిన పది కార్యక్రమాలు అశేష ప్రజానీకం మద్దతుతో సక్సెస్ అయ్యాయని జగన్ వివరించారు. మే 29న విద్యార్థి విభాగం నిరసనలతో మొదలై, జూన్ 12న 175 నియోజకవర్గాల్లో ర్యాలీలు, జూన్ 18న గవర్నర్కు వినతిపత్రం సమర్పించడం వంటి కార్యక్రమాలను ఆయన గుర్తుచేశారు. ఆగస్టు 10న అసెంబ్లీ నియోజకవర్గ కేంద్రాల్లో నిర్వహించిన ర్యాలీలతో ఈ ఉద్యమ పరంపర కొనసాగింది.
నియోజకవర్గ స్థాయి టౌన్ హాల్ సమావేశాలు, రిలే నిరాహార దీక్షలు, కలెక్టరేట్ల వద్ద వినతిపత్రాల సమర్పణ వంటి వివిధ రూపాల్లో ఈ ఉద్యమాన్ని ప్రజల్లోకి తీసుకెళ్లామని జగన్ తెలిపారు. ఈ పోరాటాలు చిరస్మరణీయంగా నిలిచిపోతాయని ఆయన పేర్కొన్నారు.
