భారత అధికారులు న్యూఢిల్లీలోని పాకిస్తాన్ హైకమిషన్ బయట రోడ్డుపై ఉన్న భద్రతా బారికేడ్లు, క్యూ నిర్వహణ షెడ్లను తొలగించారు. పరిధి దాటి నిర్మించిన ఈ అక్రమ కట్టడాలను జేసీబీల సాయంతో కూల్చివేసినట్లు అధికారులు తెలిపారు.
ఇస్లామాబాద్లోని భారత హైకమిషన్ కార్యాలయం బయట పాకిస్తాన్ అధికారులు బారికేడ్లను తొలగించిన మూడు రోజులకే ఈ ఘటన చోటుచేసుకోవడం గమనార్హం. పాకిస్తాన్ చర్యకు ప్రతీకారంగానే భారత్ ఈ నిర్ణయం తీసుకుందా అనే విషయంపై స్పష్టత లేదు.
ఇటీవల జమ్మూ కాశ్మీర్లో పర్యటించిన భారత అమెరికా రాయబారి సెర్గియో గోర్, ఆ ప్రాంతాన్ని భారత్లో అత్యంత ముఖ్యమైన భాగమని అభివర్ణించారు. కశ్మీర్లో శాంతిభద్రతల పరిస్థితి బాగుందని ఆయన చేసిన వ్యాఖ్యలతో పాకిస్తాన్ తీవ్ర అసహనానికి గురైంది.
ఈ వ్యాఖ్యలపై పాకిస్తాన్ ప్రభుత్వం తీవ్రంగా స్పందించింది. ఇస్లామాబాద్లోని అమెరికా రాయబారి నటాలీ బేకర్కు పాకిస్తాన్ సమన్లు జారీ చేసి, అమెరికా రాయబారి మాటలను ఖండించింది. ఆర్టికల్ 370 (జమ్మూ కాశ్మీర్కు ప్రత్యేక హోదా కల్పించే రాజ్యాంగ నిబంధన) రద్దు తర్వాత అమెరికా రాయబారి కశ్మీర్లో పర్యటించడం ఇదే మొదటిసారి.
భారత్, పాకిస్తాన్ మధ్య ఇప్పటికే ఉద్రిక్తతలు కొనసాగుతున్నాయి. తీవ్రవాదాన్ని వదులుకుంటేనే చర్చలు ఉంటాయని భారత్ స్పష్టం చేసింది. ఆపరేషన్ సింధూర్ తర్వాత సింధూ నదీ జలాల సరఫరాను కూడా భారత్ నిలిపివేసింది.
