చిట్యాల మండల కేంద్రానికి చెందిన ఆర్బీ న్యూస్ రిపోర్టర్ చిరు అలియాస్ రవీందర్పై దాడి చేసి, ఇంటి సామాగ్రిని పాడు చేసిన కేసులో నలుగురు నిందితులను పోలీసులు గురువారం అరెస్టు చేశారు. కైలాపూర్ గ్రామ శివారులో నిందితులను అదుపులోకి తీసుకున్నట్లు భూపాలపల్లి డీఎస్పీ సంపత్ రావు వెల్లడించారు. ఈ దాడికి ఉపయోగించిన ఒక మారుతి స్విఫ్ట్ కారును కూడా పోలీసులు స్వాధీనం చేసుకున్నారు.
చింతకుంటరామయ్యపల్లికి చెందిన బొజ్జం వేణుకు, అబ్బెంగుల రాజయ్యకు మధ్య నవాబుపేట శివారులోని భూమి విషయంలో గొడవలు జరుగుతున్నాయి. ఈ వివాదంపై రవీందర్ కథనాలు రాస్తూ సోషల్ మీడియాలో ప్రచారం చేయడంతో, తనపై కక్ష పెంచుకున్న వేణు దాడికి పథకం వేశాడని పోలీసులు తెలిపారు. ఆగస్టు 17న భూపాలపల్లిలో జరిగిన ఒక వెంచర్ ప్రారంభోత్సవం తర్వాత, వేణు తన స్నేహితులతో కలిసి మద్యం తాగి ఈ దాడికి ప్రణాళిక సిద్ధం చేశాడు.
అదే రోజు రాత్రి వేణు తన మేనమామ మెంగని నటరాజ్తో కలిసి, మొత్తం ఎనిమిది మందితో మూడు కార్లలో రవీందర్ ఇంటికి చేరుకున్నారు. రవీందర్ తలుపు తీయగానే నిందితులు ఇంట్లోకి చొరబడి అతడిని తీవ్రంగా కొట్టారు. గొంతు నులిమి, తలను గోడకేసి కొట్టడంతో రవీందర్ స్పృహతప్పి పడిపోయాడు. అడ్డుకోబోయిన అతని భార్యను కూడా నిందితులు బెదిరించారు.
దాడి అనంతరం నిందితులు ఇంట్లోని టీవీ, ఫ్రిజ్, గ్యాస్ స్టవ్ వంటి వస్తువులను ధ్వంసం చేసి అక్కడి నుంచి పారిపోయారు. బొజ్జం వేణు, మెంగని నటరాజ్, మొక్కిరాల ప్రణయ్, గోలి అఖిల్ అనే నలుగురిని ప్రస్తుతం అరెస్టు చేసి రిమాండ్కు తరలించారు. ఈ కేసులో పరారీలో ఉన్న మధువంశి, మహేష్, రాజేష్, ప్రశాంత్, ఆరిఫ్ అనే మరో ఐదుగురు నిందితుల కోసం గాలింపు కొనసాగుతోంది.
చట్టాన్ని చేతుల్లోకి తీసుకుని భౌతిక దాడులకు పాల్పడే ఎవరినైనా ఉపేక్షించేది లేదని, కఠిన చర్యలు తీసుకుంటామని డీఎస్పీ హెచ్చరించారు. ఈ అరెస్టుల సమయంలో చిట్యాల సీఐ మల్లేష్, ఎస్ఐ సతీష్తో పాటు పోలీసు సిబ్బంది పాల్గొన్నారు.
