బాపట్ల జిల్లా చీరాలలో ముఖ్యమంత్రి చంద్రబాబు నేడు పర్యటించనున్నారు. జాతీయ చేనేత దినోత్సవం సందర్భంగా రాష్ట్రవ్యాప్తంగా ఉన్న 71,536 చేనేత కుటుంబాలకు ఆర్థిక భరోసా కల్పించేందుకు ప్రభుత్వం రూ.179 కోట్లను విడుదల చేస్తోంది. 'నేతన్న సేవలో' పథకం కింద ఒక్కో కుటుంబానికి రూ.25 వేల చొప్పున నేరుగా ఆర్థిక సాయం అందించనున్నారు.
ఉదయం 10.30 గంటలకు క్యాంపు కార్యాలయం నుంచి బయలుదేరిన సీఎం, 10.50 గంటలకు వేటపాలెం మండలం కొత్తపేట గ్రామానికి చేరుకుంటారు. అక్కడ 11.05 గంటలకు ఏర్పాటు చేసిన ప్రజావేదిక సభలో ఆయన ప్రసంగిస్తారు. చేనేత రంగాన్ని ప్రోత్సహించడం, నేతన్నల ఆర్థిక స్థితిగతులను మెరుగుపరచడం ఈ కార్యక్రమ ప్రధాన ఉద్దేశమని ప్రభుత్వం పేర్కొంది.
మధ్యాహ్నం 1.35 గంటలకు జాండ్రపేటలో చేనేత వర్క్షాప్ను సీఎం సందర్శిస్తారు. ఈ సందర్భంగా లబ్ధిదారులతో ముఖాముఖి నిర్వహించి, వారి సమస్యలు మరియు భవిష్యత్తు అవసరాలపై చర్చిస్తారు. చేనేత రంగానికి ప్రభుత్వం అందిస్తున్న మద్దతుపై వారి అభిప్రాయాలను అడిగి తెలుసుకోనున్నారు.
పర్యటనలో భాగంగా సాయంత్రం 4.10 గంటలకు కొత్తపేటలో టీడీపీ నేతలతో సీఎం సమీక్షా సమావేశం నిర్వహిస్తారు. పార్టీ కార్యకలాపాలు, క్షేత్రస్థాయి పరిస్థితులపై చర్చించిన అనంతరం, సాయంత్రం 4.45 గంటలకు ఆయన తిరిగి క్యాంపు కార్యాలయానికి చేరుకుంటారు.
