బీజేపీ జాతీయ అధ్యక్షుడు నితిన్ నబిన్ ప్రకటించిన 65 మంది సభ్యుల కొత్త బృందంలో సందీప్ పాఠక్కు జాతీయ కార్యదర్శిగా బాధ్యతలు అప్పగించారు. ఈ ఏడాది ఏప్రిల్ నెలలో ఆమ్ ఆద్మీ పార్టీ (AAP) నుంచి ఏడుగురు రాజ్యసభ ఎంపీలు బీజేపీలో చేరగా, వారిలో పాఠక్ మాత్రమే ఈ కీలక పదవిని దక్కించుకున్నారు.
ఛత్తీస్గఢ్లో జన్మించిన సందీప్ పాఠక్, బ్రిటన్లోని కేంబ్రిడ్జ్ యూనివర్సిటీ నుంచి పీహెచ్డీ పూర్తి చేశారు. ఐఐటీ ఢిల్లీలో అధ్యాపకుడిగా, ఎంఐటీ వంటి సంస్థల్లో రీసెర్చ్ అసోసియేట్గా పనిచేసిన ఆయన, ఆ తర్వాత రాజకీయాల్లోకి ప్రవేశించి అరవింద్ కేజ్రీవాల్కు నమ్మకమైన వ్యూహకర్తగా మారారు. డేటా, శాస్త్రీయ సర్వేలు, బూత్ స్థాయి సమాచారం ఆధారంగా ఎన్నికల ప్రణాళికలు రూపొందించడంలో ఆయన ప్రత్యేక గుర్తింపు పొందారు.
2022 పంజాబ్ అసెంబ్లీ ఎన్నికల్లో ఆప్ సాధించిన చారిత్రక విజయంలో పాఠక్ కీలక పాత్ర పోషించారు. మొత్తం 117 స్థానాలకు గాను 92 సీట్లు గెలుచుకోవడంలో ఆయన వ్యూహాలు పనిచేశాయి. ఈ విజయంతో ఆయన పంజాబ్ నుంచి రాజ్యసభకు ఎన్నికవ్వడమే కాకుండా, డిసెంబర్ 2022 నాటికి ఆప్ జాతీయ ప్రధాన కార్యదర్శి స్థాయికి ఎదిగారు.
అయితే, ఏప్రిల్ నెలలో రాఘవ్ చద్దా, హర్భజన్ సింగ్, స్వాతి మాలీవాల్ వంటి ప్రముఖులతో పాటు సందీప్ పాఠక్ కూడా బీజేపీలో చేరారు. వీరిలో ఎవరికి పదవి దక్కుతుందనే చర్చ నడుస్తున్న సమయంలో, బీజేపీ హైకమాండ్ పాఠక్ను ఎంపిక చేయడం వెనుక పంజాబ్ రాజకీయ సమీకరణాలు ఉన్నట్లు కనిపిస్తోంది. శిరోమణి అకాలీదళ్తో పొత్తు తెగిపోయిన నేపథ్యంలో, పంజాబ్లో ఒంటరిగా పోటీ చేసేందుకు బీజేపీ సిద్ధమవుతోంది.
గ్రామీణ మరియు సిక్కు ప్రాబల్య ప్రాంతాల్లో పార్టీని విస్తరించడానికి క్షేత్రస్థాయి నెట్వర్క్ అవసరమని బీజేపీ భావిస్తోంది. ఆప్ క్షేత్రస్థాయి యంత్రాంగం ఎలా పనిచేస్తుందో పాఠక్కు పూర్తి అవగాహన ఉండటంతో, ఆయన వ్యూహాలు తమకు కలిసి వస్తాయని బీజేపీ ఆశిస్తోంది. గతంలో ఆప్ విజయానికి బ్లూప్రింట్ గీసిన వ్యక్తి ఇప్పుడు ప్రత్యర్థి శిబిరంలో ఉండటం పంజాబ్ రాజకీయాల్లో ఆసక్తికరంగా మారింది.
