నాగాలాండ్ పర్యాటక, ఉన్నత విద్యాశాఖ మంత్రి టెంజెన్ ఇమ్నా అలాంగ్ తన X ఖాతాలో ఒక వీడియోను షేర్ చేశారు. గుర్తింపును ధ్రువీకరించే కేవైసీ (KYC) ప్రక్రియలో భాగంగా, కళ్లను స్కాన్ చేసే యంత్రం సరిగ్గా పనిచేయక ఒక వ్యక్తి పడుతున్న ఇబ్బందులను అందులో చూపించారు. స్కాన్ పూర్తి చేయడానికి అక్కడున్న వారు సదరు వ్యక్తి కళ్లను చేతులతో బలవంతంగా తెరిచి పట్టుకోవాల్సి వచ్చింది.
ఈ వీడియోకు “The struggle is real” అని క్యాప్షన్ ఇచ్చిన మంత్రి, సాంకేతికతలో ఎదురవుతున్న ఈ సమస్యను హాస్యభరితంగా ఎత్తిచూపారు. అయితే, ఈ వీడియో చూసిన నెటిజన్లు డిజిటల్ సేవల్లో బయోమెట్రిక్ వ్యవస్థల రూపకల్పనపై ఆందోళన వ్యక్తం చేస్తున్నారు. విభిన్న శారీరక లక్షణాలు కలిగిన ప్రజలందరికీ ఇబ్బంది లేకుండా సాంకేతికతను రూపొందించాల్సిన అవసరం ఉందని వారు అభిప్రాయపడుతున్నారు.
భారతదేశంలోని విభిన్న శారీరక లక్షణాలను పరిగణనలోకి తీసుకోకుండా రూపొందించిన బయోమెట్రిక్ వ్యవస్థలు, డిజిటల్ సేవలు పొందడంలో అడ్డంకిగా మారుతున్నాయని పలువురు నెటిజన్లు పేర్కొన్నారు. ఇలాంటి సమస్యలు తలెత్తకుండా ప్రత్యామ్నాయ ధ్రువీకరణ పద్ధతులను అందుబాటులో ఉంచాలని వారు ప్రభుత్వాన్ని కోరుతున్నారు.
ఈశాన్య భారత ప్రజల ముఖ లక్షణాలపై ఉన్న మూసధోరణులను టెంజెన్ గతంలోనూ తనదైన శైలిలో ప్రస్తావించారు. 2022లో జరిగిన ఒక కార్యక్రమంలో, తన చిన్న కళ్ల గురించి ఆయన చేసిన వ్యాఖ్యలు అప్పట్లో వైరల్ అయ్యాయి. ఇప్పుడు కేవైసీ వీడియో ద్వారా, సాంకేతికతలో సమ్మిళితత్వం ఉండాలనే అంశంపై ఆయన మరోసారి చర్చను తెరపైకి తెచ్చారు.
