మెగాస్టార్ చిరంజీవి, రంభ ప్రధాన పాత్రల్లో నటించిన 'బావగారు బాగున్నారా?' సినిమా టైటిల్ ఖరారు వెనుక అప్పటి అసిస్టెంట్ డైరెక్టర్ వి.ఎన్.ఆదిత్య కీలక పాత్ర పోషించారు. ఈ సినిమా కోసం చిత్ర బృందం తొలుత 96 రకాల టైటిళ్లను పరిశీలించినా, ఏదీ సంతృప్తినివ్వలేదు. అప్పటికే జయంత్ సి. పరాన్జీ దర్శకత్వంలో వచ్చిన 'ప్రేమించుకుందాం రా' విజయం సాధించడంతో, టైటిల్ చివర 'రా' ఉండాలనే ఆలోచనలో వారు ఉన్నారు.
ఒకరోజు చిరంజీవి, జయంత్ సి. పరాన్జీ, నాగబాబు, పరుచూరి వెంకటేశ్వర రావు వంటి వారు ఆఫీసులో ఉన్నప్పుడు, ఆదిత్యకు అకస్మాత్తుగా 'బావగారు బాగున్నారా?' అనే పేరు తట్టింది. కథలో ఇంటర్వెల్కు ముందు రంభకు చిరంజీవి తన అక్క మొగుడని తెలిసే సన్నివేశం ఉందని, ఆ షాక్లో ఆమె అడిగే ప్రశ్న ఇదేనని ఆదిత్య వివరించారు. ఈ ఆలోచన చిరంజీవికి బాగా నచ్చడంతో, వెంటనే మీడియాకు ప్రకటించడానికి ఆయన సిద్ధమయ్యారు.
దర్శకుడు జయంత్ సి. పరాన్జీ తన టీమ్ సభ్యులకు, అసిస్టెంట్ డైరెక్టర్లకు ఇచ్చే గుర్తింపు గురించి ఆదిత్య ప్రత్యేకంగా ప్రస్తావించారు. షూటింగ్ సమయంలో హీరోలకు కూడా ఆ సీన్ చెప్పింది ఎవరనే విషయాన్ని జయంత్ బహిరంగంగానే చెప్పేవారని ఆయన గుర్తు చేసుకున్నారు. ఈ సంస్కృతిని తాను జయంత్ దగ్గరే నేర్చుకున్నానని, ప్రతి దర్శకుడు ఇలాగే ఉండాలని ఆదిత్య అభిప్రాయపడ్డారు.
ఆదిత్య కృషిని గుర్తించిన చిరంజీవి, నాగబాబు, పరుచూరి బ్రదర్స్ ఆయనకు స్క్రీన్ప్లే రైటర్గా కూడా క్రెడిట్ ఇచ్చారు. సినిమా 100 రోజుల వేడుకలో, చిరంజీవి స్వయంగా ఆదిత్యను స్టేజీపైకి పిలిచి, ప్రధాన సాంకేతిక నిపుణులకు ఇచ్చే పెద్ద షీల్డ్ ఇచ్చి సత్కరించారు. భవిష్యత్తులో మంచి దర్శకుడు అవుతావని ఆదిత్యను చిరంజీవి అప్పుడే అభినందించారు.
